Hormatly Prezidentimiz Serdar Berdimuhamedow Iki Mukaddesligiň Hyzmatkäri Saud Arabystanynyň Patyşasy Salman ben Abdelaziz Al Sauda hem-de Saud Arabystany Patyşalygynyň Mirasdüşer Şazadasy, Premýer-ministri Mohammed bin Salman bin Abdelaziz Al Sauda Saud Arabystany Patyşalygynyň Milli güni mynasybetli tüýs ýürekden gutlaglaryny we iň gowy arzuwlaryny ýollady.
«Türkmenistan bilen Saud Arabystany Patyşalygynyň arasyndaky syýasy, söwda-ykdysady, medeni-ynsanperwer we beýleki ugurlar boýunça ýola goýlan gatnaşyklaryň täze mazmun bilen baýlaşdyrylýandygyny bellemek guwandyryjydyr» diýip, hormatly Prezidentimiz Serdar Berdimuhamedow belledi hem-de iki ýurduň arasyndaky gatnaşyklara aýratyn ähmiýet berilýändigini we ony hil taýdan ýokary derejä çykarmaga taýýardygyny beýan etdi. Şeýle-de bu gatnaşyklaryň ösdürilmeginiň iki ýurduň halklarynyň bähbidine hyzmat etjekdigine berk ynam bildirildi.
Şu ýakymly mümkinçilikden peýdalanyp, hormatly Prezidentimiz Patyşa Salman ben Abdelaziz Al Sauda hem-de Mirasdüşer Şazada, Premýer-ministr Mohammed bin Salman bin Abdelaziz Al Sauda tüýs ýürekden berk jan saglyk, bagt we abadançylyk, Saud Arabystany Patyşalygynyň doganlyk halkyna bolsa parahatçylyk, mundan beýläk-de ösüş, rowaçlyk arzuw etdi.
«Goý, Gudraty Güýçli Allatagala Size ýurduňyzyň we külli musulman ymmatynyň bähbidine gönükdirilen ähli asylly başlangyçlaryňyzda hem-de maksatlaryňyzda medet bersin!» diýip, hormatly Prezidentimiz Serdar Berdimuhamedow hatynda belledi.