Türkmenistanyň Prezidenti Serdar Berdimuhamedow Merkezi Aziýa döwletleriniň Baştutanlarynyň altynjy Konsultatiw duşuşygyna gatnaşmak üçin Gazagystanyň paýtagty Astana şäherine bardy. Türkmenistanyň Prezidentini halkara howa menzilinde Gazagystanyň Premýer-ministri Olžas Bektenow garşylady.
Türkmenistan bilen Gazagystanyň söwda-ykdysady hyzmatdaşlygy yzygiderli ösdürilýär. Soňky 5 ýylda özara söwdanyň möçberi 4 esse ýokarlanyp, soňky ýylda 28 göterim artdy. Şu ýylyň 6 aýynda haryt dolanyşygy 237.2 million dollara deň boldy.
Gaz pudagy we ulag-üstaşyr ulgamy häzirki wagtda hyzmatdaşlygy has-da ösdürmek babatda geljegi uly ugurlar hasaplanýar. Ulag-üstaşyr ulgamynda birnäçe iri taslamalar durmuşa geçirilýär. Olaryň hatarynda Türkmenbaşy-Garabogaz-Gazagystan serhedi awtomobil ýoludyr.
225 kilometrlik awtomobil ýoly hem-de Garabogazgöl aýlagynyň üstünden geçýän köpri taslamasy möhümdir.
Şeýle hem gazak tarapy uzynlygy 165 kilometre barabar bolan Žanaözen-Türkmenistan serhedi awtomobil ýolunyň durkuny täzelemek taslamasynyň üstünde iş alyp barýar.