Hormatly Prezidentimiz Serdar Berdimuhamedow Duşenbede geçirilýän Araly halas etmegiň halkara gaznasyny esaslandyryjy döwletleriň Baştutanlarynyň sammitinde eden çykyşynda Aral meselesi bilen bagly teklipleriň birnäçesini öňe sürdi. Bu barada “Türkmenistan” gazeti habar berýär.
Döwlet Baştutanymyz çykyşynda, ilkinji nobatda, Araly halas etmegiň halkara gaznasynyň şertnama-hukuk esasyny kämilleşdirmek boýunça işleri işjeňleşdirmegi, geljekki işiň maksatdyr wezipelerini kesgitlemegi teklip etdi. Şeýle-de Aral deňzi sebitinde bar bolan giň ugurly meseleleriň çözgüdi bilen bagly taslamalarydyr maksatnamalary durmuşa geçirmek üçin AHHG-nyň halkara maliýe düzümleri we donorlar bilen özara hereketleri babatda mümkinçilikleriň döredilmeginiň zerurdygy barada aýdyldy.
Hormatly Prezidentimiz Türkmenistanyň ýöriteleşdirilen düzümi — Merkezi Aziýada howanyň üýtgemegi bilen bagly tehnologiýalaryň sebit merkezini döretmegi teklip edýändigini nygtap, biziň ýurtlarymyz tarapyndan Merkezi Aziýada suw serişdelerini saklamaga we rejeli peýdalanmaga gönükdirilen halkara resminamalary işläp taýýarlamak hem-de kabul etmek işini işjeňleşdirmegiň möhümdigine ünsi çekdi. Mundan başga-da, Merkezi Aziýada daşky gurşawy goramak boýunça Hereketleriň sebitleýin maksatnamasyny döwrebaplaşdyrmak meselesine seretmek teklip edildi.
Hormatly Prezidentimiz Serdar Berdimuhamedow ýurdumyzyň tekliplerini beýan edip, çykyşynyň ahyrynda şu günki duşuşygyň biziň umumy bähbitlerimizi ilerletmäge oňyn mümkinçilik berjekdigine ynam bildirdi.