Pakistanda iş saparynda bolýan Türkmenistanyň Ministrler Kabinetiniň Başlygynyň orunbasary, daşary işler ministri Raşid Meredow Pakistan Yslam Respublikasynyň Premýer-ministri Şahbaz Şarif bilen duşuşdy. Duşuşykda iki ýurduň arasyndaky gatnaşyklaryň häzirki ýagdaýy hem-de ony ösdürmegiň ugurlary boýunça pikir alşyldy.
Türkmenistanyň Ministrler Kabinetiniň Başlygynyň orunbasary, daşary işler ministri Raşid Meredow Şanhaý Hyzmatdaşlyk Guramasynyň Hökümet Baştutanlarynyň sammitiniň hormatly myhman hökmünde gatnaşýar.
Şu nukdaýnazardan, taraplar Türkmenistan-Pakistan hyzmatdaşlygynyň köp sanly meselesine seretdiler, ileri tutulýan ugurlaryny kesgitlediler we syýasy-diplomatik, söwda-ykdysady, medeni-ynsanperwer we beýleki ugurlarda döwletara hyzmatdaşlygy dowam etdirmäge taýýardyklaryny tassykladylar.
Iki döwletiň hem gatnaşýan iri we uzak möhletli halkara ykdysady taslamalaryny durmuşa geçirmek üçin bilelikdäki çäreleri güýçlendirmek zerurlygyna aýratyn üns berildi.
Hususan-da, Türkmenistan-Owganystan-Pakistan-Hindistan (TOPH) gaz geçiriji taslamalarynyň we Türkmenistan-Owganystan-Pakistan boýunça ýokary woltly elektrik geçiriji liniýasynyň iş ýüzünde durmuşa geçirilmegi bilen baglanyşykly ikitaraplaýyn resminamalary taýýarlamak boýunça işleriň gutarnykly ähmiýeti nygtaldy.
Ulag we logistika pudagynda bilelikdäki işleriň ähmiýeti hem bellendi, häzirki wagtda Türkmen’stan tarapy Pakistanyň iri kompaniýalary bilen hyzmatdaşlyk edýär, şolaryň arasynda Milli Logistika Korporasiýasy (NLC) aýratyn orny eýeleýär we bu ugurdaky hyzmatdaşlyk Hytaý-Pakistan-Owganystan-Türkmenistan ugry boýunça Merkezi Aziýa we Hazar sebitiniň bazarlaryna çykmak babatda ýük gatnamalaryň möçberini ep-esli ýokarlandyrar.
Şeýle hem taraplar özara gyzyklanma bildirilýän hyzmatdaşlyk gatnaşyklarynyň beýleki meselelerini ara alyp maslahatlaşdylar.