Türkmenistanda durmuş hyzmatlary ulgamyny özgertmäge gönükdirilen giň gerimli birýyllyk maksatnama üstünlikli tamamlandy. Zähmet we ilaty durmuş taýdan goramak ministrligi Bilim ministrligi bilen bilelikde, ÝUNISEF-iň goldawy esasynda, ýurt boýunça müňlerçe maşgalalara goldaw boljak hünärmenleriň milli sertifikasiýasynyň jemlerini jemledi.
Maksatnamanyň tamamlanmagy «Durmuş hyzmatlary hakynda» kanunyň kabul edilmeginiň 4 ýyllygyna gabat geldi. Bu döwürde ýurt diňe bir halkara ülňülerini ornaşdyrman, eýsem raýatlara goldaw bermek boýunça özboluşly milli modeli hem döretdi.
Häzirki zaman durmuş gullugy — diňe söhbetdeşlik däl, eýsem kömegiň anyk tehnologiýalarydyr. Okuwlar üç esasy ugra gönükdirildi:
-
Netijeli aragatnaşyk — köplenç öz meseleleri barada adamlary diňläp bilmek ukyby;
-
Keýs-menejment (ýagdaýlary dolandyrmak) — meseläniň ýüze çykarylmagyndan başlap, onuň doly çözülmegine çenli maşgalany ugurdaş alyp barmak;
-
Maglumatlara esaslanan baha bermek — duýgulara daýanýan kömekden subutnamalara esaslanýan goldawa geçmek.
ÝUNISEF-iň Türkmenistandaky wekili Jalpа Ratna häzirki wagtda Türkmenistanyň sebitde maşgala institutyny berkitmek boýunça öňdebaryjy orunlary eýeleýändigini belledi.
«Durmuş gullugy ulgamyň binýadydyr. Olaryň başarnyklaryna maýa goýmak bilen, ýurt her bir çaganyň hukuklarynyň ygtybarly goragly bolýan has durnukly jemgyýeti gurýar», — diýip ol aýtdy.
Maksatnamanyň möhüm aýratynlyklaryndan biri akademiki gurşawy hakyky durmuş bilen utgaşdyrmak boldy. Taslamanyň esasy intellektual merkezleri Magtymguly adyndaky Türkmen döwlet uniwersiteti hem-de Seýitnazar Seýdi adyndaky Türkmen döwlet mugallymçylyk instituty boldy.
Indi talyplar diňe okuw kitaplary boýunça teoriýany öwrenmän, eýsem maşgalalaryň hakyky zerurlyklaryny seljermegiň işine gatnaşýarlar, diplomlaryny bolsa amaly kömegiň netijeli gurallaryna öwürýärler.
Soňky bäş ýylyň dowamynda «Her bir çaga» atly global hyzmatdaşlygyň goldawy bilen Türkmenistan dünýäniň iň gowy tejribelerini milli aňyýete laýyklaşdyrmagy başardy. Netijede, diňe «hyzmatlary ýerine ýetirýän» däl-de, eýsem maşgalalara kynçylyklary ýeňip geçmäge we has berk bolmaga kömek edýän ulgam döredildi.
ÝUNISEF Türkmenistanyň Hökümeti bilen bilelikde mundan beýläk hem ýakyn hyzmatdaşlygy dowam etdirmäge taýýardygyny tassyklaýar. Maksat — ýokary hilli durmuş goldawynyň her bir etrapda we her bir öýde elýeterli bolmagydyr.