Eýran Yslam Respublikasynyň Demirgazyk Horasan welaýatynyň häkimi Mohammad Reza Huseýnnejadyň ýolbaşçylygyndaky wekiliýet Türkmenistanda saparda bolup, iki ýurduň arasyndaky söwda gatnaşyklary ösdürmäge degişli meseleleri ara alyp maslahatlaşdylar.
Eýranyň metbugatynyň habar bermegine görä, geçirilen gepleşikleriň esasy ugurlarynyň biri, ýurtlaryň arasynda söwda gatnaşyklaryny ösdürmek maksady bilen serhetýaka hyzmatdaşlygyny ösdürmek meselesi boldy.
Ikitaraplaýyn duşuşyga gatnaşyjylar hususy pudagyň gatnaşmagynda bilelikdäki söwda we ykdysady taslamalary durmuşa geçirmek üçin ägirt uly mümkinçilikleriň bardygyny bellediler. Lukmançylyk, üzümçilik, oba hojalygy, ýöriteleşdirilen sergileri guramak we ş.m. hyzmatdaşlygy güýçlendirmek üçin mümkin bolan ugurlaryň hataryna goşuldy.
Taraplar şeýle hem şu ýylyň iýun aýynda Türkmenistanyň Prezidentiniň Eýrana resmi sapary wagtynda goňşy döwletleriň arasynda gol çekilen ähtnamalaryň ýerine ýetirilişine gözegçilik etjek bilelikdäki komitetiň döredilmegini ara alyp maslahatlaşdylar.
Şeýle hem “Watan” habarlar gepleşiginde bellenilip geçilişi ýaly, Eýranyň wekiliýeti Aal welaýatynyň häkimliginde gepleşikler geçirdi. Mundan başga-da, goňşy ýurduň wekiliýeti Ahal welaýatynyň Gökdepe etrabynda “Türkmen aýna önümleri” zawodynda hem-de Babadaýhan dokma toplumynda bolup, bu iri senagat desgalarynyň kuwwaty we önümçilikleri bilen tanyşdylar.