Şu gün Türkmenistanyň Türkmenabat şäherinden Russiýanyň Moskwa şäherine Moskwa-Türkmenabat-Moskwa ugry boýunça ýörite uçar gatnawy amala aşyryldy. Bu barada Russiýa Federasiýasynyň Türkmenistandaky ilçihanasy habar berýär.
Russiýanyň ilçihanasynyň resmi saýtynda ýerleşdirilen maglumata görä, “S7” rus awiakompaniýasy Moskwa-Türkmenabat-Moskwa ugry boýunça ýörite uçar gatnawyny ýerine ýetirdi. Türkmenabat-Moskwa ugry boýunça amala aşyrylan ýörite gatnawdan 198 ýolagçy peýdalandy.
Rus kompaniýasy 2022-nji ýylyň 15-nji ýanwarynda 33-nji gatnawyny amala aşyrypdy.
Russiýa Federasiýasynyň Türkmenistandaky ilçihanasynyň goldaw bermeginde Russiýanyň “S7” awiakompaniýasy koronawirus pandemiýasy sebäpli wagtlaýynça togtadylan halkara uçar gatnawlarynyň ýerine ýörite gatnawlary ýerine ýetirýär.
2020-nji ýylyň martyndan bäri, Russiýanyň “S7” awiakompaniýasy 34-nji ýörite gatnawyny ýerine ýetirdi.