Ozal habar berşimiz ýaly, Russiýanyň Türkmenistandaky ilçihanasynyň gurnamagynda “S7” awiakompaniýasy nobatdaky ýörite uçar gatnawyny 2022-nji ýylyň 28-nji ýanwarynda amala aşyrmagy göz öňünde tutýar.
Bu barada Russiýanyň Türkmenistandaky ilçihanasynyň “Telegram” jemgyýetçilik torunda habar berlipdi. Russiýanyň ilçihanasynyň jemgyýetçilik toruna ýerleşdirilen täze maglumatda, 28-nji ýanwarda göz öňünde tutulan ýörite uçar gatnawy üçin 24-nji ýanwardan awiapetekler satylyp başlanýar.
Hususan-da, jemgyýetçilik torundaky habarnamada, 24-nji ýanwarda “S7” awiakompaniýasynyň Aşgabat şäherindäki wekilhanasynyň kassalarynda sagat 11:00-dan başlap, Türkmenabat-Moskwa ugry boýunça uçar gatnawyň awiapetekleri satylyp başlanýar.
24-nji ýanwarda
– talonly bilet satyn alýan adamlar;
– birikdirilen ulgam boýunça bilet satyn alýan adamlar;
– haýwanlary bolan ýolagçylar;
– bejergi maksady bilen syýahat edýän adamlar;
– biznes synpynda uçýan adamlar.
Beýleki kategoriýadaky ýolagçylar bolsa, awiapeteklerini 25-nji ýanwarda awiakompaniýasynyň wekilhanasynda sagat 10:00-dan satyn alyp bilerler.
2022-nji ýyl boýunça “S7” awiakompaniýasy Russiýanyň Türkmenistandaky ilçihanasynyň gurnamagynda ilkinji ýörite gatnawy 14-nji ýanwarda ýerine ýetiripdi. Üstümizdäki ýylyň 2-nji ýörite gatnawy 28-nji ýanwarda ýerine ýetirmek göz öňünde tutulýar.