Türkiýe Respublikasynyň energetika we tebigy serişdeler ministri Alparslan Baýraktar ABŞ-nyň ykdysadyýet ugurly “Bloomberg” gazeti bilen söhbetdeş boldy. Neşiriň internet sahypasyndaky habarya görä, Türkiýäniň ministri Alparslan Baýraktar şu aýyň dowamynda Türkmenistana sapar bilen barmagy meýilleşdirýändigini belledi.
Mälim bolşy ýaly, Türkiýe Respublikasy ýakyn wagtda Türkmenistan hem-de Eýran Yslam Respublikasy bilen tebigy gaz pudagynda hyzmatdaşlyk etmek boýunça ylalaşyklara gol çekdi.
Şol ylalaşyklar bilen baglylykda tebigy gazyň üpjünçiligi babatda alnyp barylýan işler barada beýanat beren ministr Baýraktar şeýle diýdi:
– Şu aýyň dowamynda Türkmenistana sapara barmagy meýilleşdirýärin. Şol ýerde netije alyp, taryhymyzda ilkinji gezek türkmen gazyny Türkiýä getirmek mümkinçiligine eýe bolup bileris, diýip umyt edýärin. Ilkinji nobatda, “swap” görnüşinde türkmen gazynyň Eýrana berilmegi, onuň hem bize Eýranyň serhedinden ýa-da Azerbaýjan-Eýran ugry boýunça iberilmegi göz öňünde tutulýar.
Energetika ministri Baýraktar ilkinji tapgyrda 1.5-2 milliard kubmetr tebigy gazyň alynmagynyň göz öňünde tutulýandygyny, şol bir wagtda munuň Ýewropanyň energetika howpsuzlygynda möhüm orun alyp biljekdigini belledi.
Mälim bolşy ýaly, Azerbaýjanyň Döwlet nebit kompaniýasy (SOCAR) bilen Türkiýäniň “Botaş” döwlet kompaniýasynyň arasynda 2024-nji ýylyň 4-nji iýunynda türkmen tebigy gazyny Azerbaýjanyň üsti bilen Türkiýe Respublikasyna ibermek boýunça ylalaşyga gol çekilipdi.
2024-nji ýylyň martynda bolsa, Türkmenistan bilen Türkiýe Respublikasynyň arasynda tebigy gaz pudagynda hyzmatdaşlygy ösdürmek boýunça ähtnama gol çekilipdi.
Şeýle hem golaýda, Türkmenistanyň “Türkmengaz” döwlet konserni bilen Eýran Yslam Respublikasynyň arasynda 10 milliard kubmetr türkmen tebigy gazyny Eýranyň üsti bilen “swap” görnüşinde Yrak Respublikasyna ibermek boýunça degişli ylalaşyk gazanylypdy.
Baýraktar: türkmen gazyny Eýranyň üsti bilen import etmegi meýilleşdirýäris