Özbegistanyň Andijon welaýatynda 6 gektar meýdanda «Emeli intellekt» tehnologiýasy ornaşdyryldy. Synag üçin alnan bu ýer bölegi baradaky ähli maglumatlar «Monterra» onlaýn platformasyna ýerleşdirildi.
Ýerden alynýan hasylyň mukdaryny artdyrmaga ýardam berjek täze tehnologiýanyň ähmiýetli taraplary özbek metbugatynda şeýle sanalýar:
— tehnologiýa bellenen ýer bölegi baradaky maglumatlary ýyllaryň dowamynda özünde saklar. Şeýlelikde, bu ýer barada gözegçilik maglumatlarynyň arhiwi jemlener. Bu arhiw bolsa, ýer bilen indiki işleşjekler üçin gymmatly maglumata öwrüler;
— tehnologiýa topografik we katastr kartalaryny çyzar;
— ekin meýdanlarynyň relýefini takyk kesgitlär;
— gowaçanyň we bugdaýyň (ýa-da şol ýere ekilen beýleki ekinleriň) ösüş ýagdaýyna onlaýn gözegçilik etmäge mümkinçilik berer;
— ekilen ekinleriň görnüşleri we ýagdaýy baradaky maglumatlary özünde ýygnar.
Synaglar üstünlikli geçen ýagdaýynda ýurtda bu häzirki zaman tehnologiýasyndan köpçülikleýin peýdalanmak pikiri bar.