Nýu-Ýork şäheri we Nýu-Jersi ştaty 2026-njy ýylda geçiriljek futbol boýunça dünýä çempionatyndan 3,3 milliard dollar girdeji gazanar. Bu barada “Bloomberg” neşiri habar berýär.
Dünýä çempionatynyň sekiz duşuşygy, şol sanda final oýny Nýu-Jersi ştatynda ýerleşýän “MetLife” stadionynda geçiriler.
Hökümetler çempionata takmynan 1,2 million syýahatçynyň we janköýeriň gelmegine garaşýarlar, bu bolsa sebitiň sarp ediş çykdajylarynyň takmynan 1,7 milliard dollar artmagyna getirip biler.
Hasaplamalara görä, dünýä çempionaty 26 müň täze iş ornuny döreder, zähmet bazarynyň ýokarlanmagy bolsa şäheriň we ştatyň ykdysadyýetine goşmaça 1,3 milliard dollar girdeji getirer. Ýerli býujet üçin goşmaça salgyt girdejileri we ýygymlar takmynan 432 million dollar bolar.
2026-njy ýyldaky futbol boýunça dünýä çempionaty 11-nji iýun – 19-njy iýul aralygynda ABŞ-da, Kanadada we Meksikada ýerleşýän 16 şäherde geçiriler. Bu ýaryşa ilkinji gezek 48 topar gatnaşar.