Şu gün türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow bilen Türkiýäniň Beýik Millet Mejlisiniň (TBMM) Başlygy Mustafa Şentopyň arasynda telefon arkaly söhbetdeşlik boldy. Bu barada TBMM-niň resmi saýtynda bellenilip geçilýär.
TBMM Başlygy Mustafa Şentop Türkiýäniň Kahramanmaraş welaýatynda bolup geçen we 11 welaýata öz täsirini ýetiren tebigy betbagtçylykdan soňra Türkmenistanyň beren goldaw-kömekleri üçin Halk Maslahatynyň Başlygy Gurbanguly Berdimuhamedowa öz minnetdarlygyny bildirdi.
Türkmenistanyň lukmanlarynyň we ýer titreme bolan sebitdäki çagalar üçin iberilen ynsanperwer kömekleri üçin özüniň hoşallygyny bildiren Şentop: “Bu betbagtçylykdan soň, Siz we doganlyk türkmen halky bize zerur bolan wagty biziň ýanymyzda boljakdygyňyzy ýene bir gezek görkezdiňiz. Doganlyk Türkmenistanyň ýurdumyza beren kömegini hemişe uly minnetdarlyk bilen ýatlarys “-diýip belledi.
Telefon arkaly söhbetdeşligiň barşynda ikitaraplaýyn hyzmatdaşlyk gatnaşyklary, şol sanda parlamentara gatnaşyklar ara alyp maslahatlaşyldy.
Mundan başga-da, taraplar sebit we halkara meseleleri boýunça pikir alyşdylar.