Latwiýa Respublikasynyň Prezidenti Edgar Rinkewiç Türkmenistanyň Prezidentine Garaşsyzlyk güni mynasybetli gutlag hatyny iberdi. Şol hatda Edgar Rinkewiç Türkmenistanyň Latwiýanyň ýakyn hyzmatdaşy we dostlukly ýurdudygyny, şeýle hem ýurtlarymyzyň arasyndaky netijeli gatnaşyklara ýokary baha berýändigini belleýär.
Bu gutlag hatynda şeýle diýilýär:
Latwiýanyň halkynyň adyndan, şeýle hem hut öz adymdan Türkmenistanyň Garaşsyzlyk güni mynasybetli tüýs ýürekden gutlaglarymy we iň gowy arzuwlarymy beýan etmäge rugsat ediň!
Türkmenistan Latwiýanyň ýakyn hyzmatdaşy we dostlukly ýurdudyr. Men ýurtlarymyzyň arasyndaky netijeli gatnaşyklara ýokary baha berýärin hem-de ikitaraplaýyn hyzmatdaşlygymyzy mundan beýläk-de ösdürmek üçin gowy mümkinçilikler bar diýip hasaplaýaryn. Ýewropa Bileleşigi bilen Merkezi Aziýanyň arasyndaky işjeň dialogyň, hyzmatdaşlygyň özara gatnaşyklarymyzy pugtalandyrmak üçin täze ýollary açjakdygyna ynanýaryn.