Geçen ýyl ilatyň koronawirus ýokanjyna garşy sanjym edilmegi takmynan 20 million adamyň aradan çykmagynyň öňüni almaga kömek etdi – diýip, alymlar bu netijä geldiler. Lukman alymlaryň bu baradaky ylmy seljermeleri “The Lancet” žurnalynda çap edildi.
Bilermenler matematiki hasabat ýöredip, köpçülikleýin sanjymyň tutuş dünýäde adamlaryň bu ýokançlyk zerarly aradan çykmak mümkinçiligini 2 esse diýen ýaly azaldandygyny bellediler. Hünärmenleriň hasabatyna laýyklykda, sanjym edilmedik halatynda dünýäde 31,4 million adam koronawirus ýokanjynyň pidasy bolup bilerdi.
– Geljekde sanjym üçin intellektual eýeçiligi has-da giňeltmeli. Şeýle serişdeleriň öndürilmegi hem-de ýaýradylmagy bilen baglanyşykly tehnologiýalaryň we bilimleriň has aýdyň we aç-açanlykda paýlaşylmagy zerur bolup durýar – diýlip, žurnaldaky beýanatda bellenilip geçilýär.
Bilermenleriň pikirine görä, tutuş dünýäde sanjymlaryň ýaýradylmagynyň hem-de üpjün edilmeginiň infrastrukturasyny has-da giňeltmeli.
ABŞ-nyň Jon Hopkins uniwersitetiniň hasabatyna görä, pandemiýa başlandan bäri dünýäde 11,6 milliard doza möçberinde koronawirus ýokanjyna garşy dürli sanjymlar edildi we muňa garamazdan, 6,3 million adam bu ýokanjyň pidasy boldy.