Hormatly Prezidentimiz Balkan welaýatyna amala aşyrjak iş sapary bilen baglanyşykly sanly ulgam arkaly Ministrler Kabinetiniň mejlisini geçirdi.
“Watan” habarlar gepleşiginde bellenilip geçilişi ýlay, şol mejlisiň barşynda milli Liderimiziň Balkan welaýatyna amala aşyrjak iş saparyna görülýän taýýarlyk işleri barada hasabat berildi. Hasabatlarda bu saparyň çäklerinde Jebel şäherçesinde täze halkara howa menziliniň düýbüniň tutuljakdygy mälim edildi.
Mälim bolşy ýaly, golaýda “Türkmenhowaýollary” agentligi Balkan welaýatynyň Jebel şäherçesinde sagatda 100 ýolagça hyzmat etmäge mümkinçiligi bolan täze halkara howa menziliniň toplumyny taslamalaşdyrmak hem-de dolulygyna gurmak boýunça halkara bäsleşigini yglan edipdi.
Ýurdumyzda soňky ýyllarda raýat awiasiýa ulgamynyň ösdürilmegine uly ähmiýet berilýär. Şonuň netijesinde, soňky birnäçe ýylyň dowamynda paýtagtymyz Aşgabat bilen bir hatarda Türkmenbaşy we Türkmenabat şäherlerinde halkara howa menzilleri gurlup ulanmaga berildi.
Golaýda, Lebap welaýatynyň Kerki şäherinde hem sagatda 100 ýolagça hyzmat edýän täze halkara howa menziliniň toplumy ulanmaga berlipdi.