Ispaniýanyň futbol taryhynda yz galdyran futbolçylardan Andres Inýesta futbol bilen hoşlaşdy. Ispaniýanyň milli ýygyndysy hem-de “Barselona” topary bilen köp sanly üstünlikleriň eýesi bolan Inýesta şeýle günleriň hem geljekdigine garaşmandygyny belledi.
Begençli gözýaşlarynyň astynda iň söýgüli käri bolan futbol bilen hoşlanan ispan futbolçy çagalykdan futbolçy bolup arzuw edendigini, yhlasly zähmetiniň netijesinde futbolda ýokary sepgitlere ýetendigini aýtdy.
Andres Inýesta hemişe 2 futbol toparyna ykbalyny baglandygyny belläp, bu toparlaryň çagalykda oýnan “Albaset” hem-de futbolyň çür depesine çykan “Barselona” toparlarydygyny belläp geçdi.
Ispan futbolçy futbol karýerasynda “Barselona”, “Wissel Kobe” we “Emireýts” toparlarynda çykyş etdi. Ol “Barselona” bilen 4 gezek Çempionlar ligasynyň kubogyny gazandy we 9 gezek Ispaniýanyň çempiony boldy.
Ispaniýanyň milli ýygyndysy bilen 2010-njy ýylda dünýä çempiony bolan Inýesta 2008-nji we 2012-nji ýyllarda milli ýygyndy bilen Ýewropanyň çempiony bolmagy başaran tejribeli futbolçylaryň biridir.