Hytaý Halk Respublikasynyň ozalky Döwlet Geňeşiniň Premýeri Li Kesýan 68 ýaşynda Şanhaý şäherinde aradan çykdy. Bu barada “Sinhua” habarlar gullugy habar berýär.
Mälim bolşy ýaly, Li Kesýanyň dalaşgärligi 2013-nji ýylyň martynda Hytaýyň Ählihytaý ýygnagynyň halk wekilleri tarapyndan Hytaý Halk Respublikasynyň Döwlet Geňeşiniň Premýeri wezipesine tassyklanypdy. 2018-nji ýylyň martynda ol bu wezipä täzeden saýlanypdy.
Li Kesýan Hytaý Halk Respublikasynyň Döwlet Geňeşiniň Premýeri wezipesinde işlän döwründe durmuş-ykdysady meselelere has köp üns berip, ýurtda işsizligiň azaldylmagy, şäherdäki we obalardaky halkyň girdejileriniň artdyrylmagy ugrunda giň tagallalar etdi.
2013-2014-nji ýyllarda Hytaýda içerki sarp edişiň möçberi artdy, ol hem halkyň girdejileriniň artmagy bilen berk baglanyşykly boldy.
Li Kesýan 10 ýyllyk maksatnamanyň – “Hytaýda öndürildi-2025” strategiýasynyň öňbaşylarynyň biridir. Bu strategiýa Hytaýyň milli gaýtadan işleýän senagatynyň kämilleşdirilmegine gönükdirilendir.
Li Kesýan 2023-nji ýylyň martynda Hytaý Halk Respublikasynyň Döwlet Geňeşiniň Premýeri wezipesini Li Sýana tabşyrdy.