Şu günler Russiýa Federasiýasynda resmi saparda bolýan Türkmenistanyň Milli Geňeşiniň Halk Maslahatynyň Başlygy Gurbanguly Berdimuhamedow Russiýa Federasiýasynyň Döwlet Dumasynyň Başlygy Wýaçeslaw Wolodin bilen duşuşdy. Bu barada Russiýa Federasiýasynyň Döwlet Dumasynyň resmi saýtynda habar berilýär.
Russiýa Federasiýasynyň Döwlet Dumasynyň Başlygy Wýaçeslaw Wolodin Türkmenistan bilen Russiýanyň arasyndaky ikitaraplaýyn gatnaşyklar barada aýdyp, Halk Maslahatynyň Başlygynyň iňňän uly tejribesiniň we Russiýanyň Prezidenti Wladimir Putin bilen dostlugynyň iki ýurduň arasyndaky has ýygjam gatnaşyklaryň binýady bolup durýandygyny belledi.
Şeýle hem Wolodin Halk Maslahatynyň Başlygynyň şu gezekki saparynyň iki ýurduň arasyndaky parlament gatnaşyklarynyň has-da ösdürilmegine uly itergi berjekdigini mälim etdi.
Mundan başga-da, Döwlet Dumasynyň Başlygy Halk Maslahatynyň Başlygyny Hazarýaka döwletleriň Parlament ýolbaşçylarynyň duşuşygyna gatnaşmaga çagyrdy. Şeýle duşuşygy geljek ýyl Bakuda geçirmek meýilleşdirilýär.
Halk Maslahatynyň Başlygy Döwlet Dumasynyň Başlygynyň we azerbaýjanly kärdeşiniň başlangyjy goldady.
Türkmenistanyň Milli Geňeşiniň Halk Maslahatynyň Başlygy Gurbanguly Berdimuhamedow indiki ýyl Türkmenistanda türkmen-rus uniwersitetiniň düýbüniň tutuljakdygyny belläp, Döwlet Dumasynyň Başlygyny bu dabara çagyrdy.
Russiýa Federasiýasynyň Döwlet Dumasynyň Başlygy Wýaçeslaw Wolodin Türkmenistana gelmek baradaky çakylygy uly höwes bilen kabul etdi.