Eýran Yslam Respublikasynyň paýtagty Tähranda 3-nji Hazar ykdysayd forumy geçirildi. Oňa Eýran Yslam Respublikasynyň birinji wise-prezidenti Mohammed Reza Arif başlyklyk etdi. Bu foruma Hazarýaka döwletleriň – Türkmenistanyň Ministrler Kabinetiniň Başlygynyň orunbasary Hojamyrat Geldimyradow, Gazagystanyň Premýer-ministri Olžas Bektenow, Azerbaýjanyň Premýer-ministri Ali Asadow we Russiýanyň wise-premýeri Alekseý Owerçuk gatnaşdy.
Eýranyň birinji wise-prezidenti Hazarýaka döwletleriniň söwda mümkinçilikleri bilen bir hatarda üstaşyr çykdajylary azaltmak bilen bilelikdäki bahbitleriň gazanylyp bilinjekdigini belledi.
Ol Hazarýaka döwletleriniň arasynda demirýol, deňiz, awotomobil we ýük daşamalary boýunça hünärmenleriň geňeşmelerini geçirmegi teklip etdi.
Şunuň bilen baglylykda, Eýranyň 2025-nji ýylda “Hazar deňzinde ýük daşamalary” atly maslahaty geçirmäge taýýardygy beýan edildi.
Mohammed Reza Arif Eýranyň Hazar deňzinde ýük daşamalarynyň we olaryň üstaşyr geçirmeleri babatdaky bilelikdäki maýa goýumlara ýokary baha berýändigini aýtdy.
Duşuşykda çykyş eden Azerbaýjanyň Premýer-ministr Ali Asadow Hazar ykdysady forumynyň Hazarýaka döwletleriniň arasyndaky ykdysady we söwda hyzmatdaşlygynyň häzirki meselelerini ara alyp maslahatlaşmak üçin möhüm meýdança bolandygyny aýtdy.
A.Asadow Azerbaýjan bilen Hazar döwletleriniň arasyndaky ykdysady we söwda hyzmatdaşlygynyň çalt depginde ösýändigini belläp geçdi.
“2024-nji ýylyň maglumatyna görä, Azerbaýjanyň Hazar ýurtlary bilen söwda dolanyşygynyň 6 göterimden gowrak ýokarlanandygy begendirýär” – diýip, Azerbaýjanyň wekiliýetiniň ýolbaşçysy belledi.
Russiýanyň wise-premýeri Alekseý Owerçuk Hazarýaka döwletleriniň (Russiýa, Azerbaýjan, Eýran, Gazagystan, Türkmenistan) özara zerurlyklary kanagatlandyryp, energiýa çeşmelerini üpjün ediji hökmünde hereket edip biljekdigini belledi.
Forumyň çäklerinde Hazarýaka döwletleriniň sergisi guraldy. Onda bu döwletleriň ykdysady mümkinçilikleri açylyp görkezildi.