Türkmenistanyň Prezidenti Serdar Berdimuhamedowyň hem-de türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedowyň parasatly baştutanlygynda “Awaza” milli syýahatçylyk zolagynda Birleşen Milletler Guramasynyň howandarlygynda BMG-niň Deňze çykalgasy bolmadyk ösüp barýan döwletler boýunça üçünji maslahaty üstünlikli geçirildi.
Bu iri halkara forumy babatda käbir sanlary we maglumatlary dykgatyňyza ýetirýäris:
- BMG-niň Deňze çykalgasy bolmadyk ösüp barýan döwletler boýunça üçünji maslahatyna gatnaşmak maksady bilen, 104 döwletden 1179, halkara guramalaryň 46-syndan 430, 35 döwletiň köpçülikleýin habar beriş serişdelerinden 166, daşary ýurt kompaniýalarynyň 13-sinden 20, Merkezi Aziýa ýurtlarynyň we Azerbaýjanyň medeniýet işgärlerinden 429 sany, umumylykda 2 müň 224 wekil ýurdumyza sapar bilen geldi.
- 5 — 8-nji awgust aralygynda 6 sany plenar mejlis, tematiki «tegelek stol» duşuşyklarynyň 5-si, ýokary derejedäki forumlaryň 7-si, ugurdaş çäreleriň 37-si (şolaryň 5-si Türkmenistan tarapyndan) geçirildi.
- Maslahatyň işiniň barşy hem-de onuň dowamynda seredilen meseleler bilen köpçülikleýin habar beriş serişdeleriniň wekillerini tanyşdyrmak maksady bilen, 3 sany brifing guraldy.
- Türkmenistanyň Hökümetiniň agzalary, ministrlikleriň, pudak edaralarynyň ýolbaşçylary bilen Awaza forumyna gatnaşan döwletleriň we halkara guramalaryň ýolbaşçylarydyr wekilleriniň arasynda ikitaraplaýyn duşuşyklaryň 138-si geçirildi.
- Türkmenistan bilen daşary ýurtlaryň hem-de halkara guramalaryň arasynda ikitaraplaýyn resminamalaryň 6-syna gol çekildi.
- BMG-niň Deňze çykalgasy bolmadyk ösüp barýan döwletler boýunça üçünji maslahatynyň netijeleri boýunça jemleýji resminama bolan Awaza syýasy Jarnamasy kabul edildi.
- Deňze çykalgasy bolmadyk ösüp barýan ýurtlar boýunça 2024 — 2034-nji ýyllar üçin Hereketleriň maksatnamasyna seredilip, ony «2024 — 2034-nji ýyllar üçin Hereketleriň Awaza maksatnamasy» diýip atlandyrmak resmi taýdan yglan edildi.