Beýik Britaniýa Fransiýanyň “Sanofi” derman korporasiýasy bilen Angliýanyň “GSK” (GlaxoSmithKline) kompaniýasy tarapyndan bilelikde taýýarlanýan koronawirus sanjymyny satyn almak barada şertnama baglaşdy.
Beýik Britaniýa sanjymyň 60 million dozasyny satyn almakçy bolýar. Iki derman kärhanasy hem sentýabr aýynda kliniki synaglara başlamagy we sanjymy 2021-nji ýylyň birinji ýarymynda satuwa çykarmagy meýilleşdirýär.
Sanjym gribe garşy sanjymlary döretmekde eýýäm ulanylýan DNK rekombinasiýa tehnologiýasyna esaslanýar.
Şol bir wagtyň özünde, Ýewropa Komissiýasy Amerikanyň “Gilead Sciences” biofarmasewtika kompaniýasyndan “Remdesivir” söwda belligi bolan “Vekluri” farmasewtik serişdäni satyn almak barada ylalaşyga gol çekişdi. Dermanyň ilkinji tapgyry keseliň agyr alamatlary bolan takmynan 30 müň hassany bejermek üçin ulanylar we munuň bahasy 63 million ýewro deň bolar.