Kimdir biri getirdi sarsgyn turuzan bu habary… Soňra-da derrew gözden ýitdi. Her kim iňkise batdy. Her kim garabaşyna gaý. Öz aladasy özüne ýetik… Be-eý, beýle-de boljak ekeni…Öz-ä birhili geňräk ýaly…
Kyrk gün möhlet bilen bu perman geljek,
Bütin ölenleriň bary direljek.
Gum-guklukda galmaz ýaly o dünýä-
Ölenleň ýerini diriler aljak…
“Deňlik üçin beýle perman hut derkar”,
“Kim tapanam bolsa, mälim ol murdar”.
Her kim bir zat diýdi, käbiri susdy.
Haýran galan az däl: “Hany, ber karar!”
Bary-ýogy kyrk gün jydasa bor-la!
Ýygnanlarym şonça günüm görer-le!
Onsoňam soňuny görüp gelen ýok,
Taňryň özi muň yzynda durar-la!
“Seň tapýanyň näme, eý keçetelpek?!
Ertir toýum, bu gün ýapýarys çelpek,
Gaýtmyşym et, toba bilen tagsyr diý!
Täze öýlenjege salmawer külpet!”
Ýaşuly-ha diýdi: “Taýýar kepenim”,
Awçy aýtdy: “Wah, barlaýsam gapanym!”
Täze başlyk gazap atyna münýär:
“Gözüni çekseň, şu hokgany tapanyň.”
Alym aýtdy, doktorlyga maý ýokdy,
Wah, nädeýin ýeser ýerde gaý gopdy.
Belki, o dünýäde oňat goraryn –
Özüne göräje çykalga tapdy.
Maşyn alan goňşym ýaýkaýar kelle,
“At arkasyn görmedim men şu pille-
Buýrugy bir aýjyk aňry süýşüren,
Ýamanlyk ýüzüni görmez hiç, walla!”
Talybam zeýrendi, boljak uçurym,
Taňrym, özüň edewer bir geçirim.
Diplomum alaýyn, iş jähennem-le,
Kyrk günden soň, bir dukanjyk açaryn.
Dostum diýdi: “Jaý nobatym üç günden,
Epeýje pul gitdi, baram öňünden.
Kim hözirin görer bäş gatly jaýyň,
Buýruk bolaýarmy, diýşi dek çyndan!”
Ýediden ýetmişe bir tut-ha-baslyk-
Kyrk güne çydamsyz, ýüzleri asyk.
Her kim aladaly, gitmek islänok –
Bary bir galypda- kibitleri gysyk.
Şeýle bir sussupes,dünýeden geçen,
Kimi şerap, kimi akmämmet içen,
Barynda ejizlik, merdemsilik ýok,
Ýüzi ak esgi dek nurlary göçen.
Buýruga boguldy, barysy lam-jim,
Döşüne kakýanlaň agyzlary mum.
Eý Biribar üýtgedewer äheňi,
Danalaram dymýar misli bir salgym.
Buýruk güni geldi, hiç kim ýok daşda,
Daşary gum-gukluk uçanok guş-da…
Sagadymyň sesi – gutardy bary-
Soňy soraglyja süýjüje düýş-de…