“Atawatan Media” topary ABŞ-nyň San-Fransisko şäherinde dünýä belli “SailGP” halkara ýelkenli sport boýunça halkara bäsleşikleriniň bir tapgyryna tomaşa etmek mümkinçiligine eýe boldy.
“SailGP” – ýelkenli sport boýunça halkara bäsleşikleri 2018-nji ýyldan bäri geçirilip gelinýär. Ýaryşlarda ýelkenli sport ugry boýunça öňdebaryjy tehnologiýalar ulanylýar. Sport ýaryşy dünýäniň esasy iri şäherlerinde geçirilip, ýelkenli sport janköýerlerini özüne çekýär.
“SailGP” halkara ýaryşynyň möwsümdäki 4-nji tapgyrynda Ispaniýanyň topary ýeňiji boldy. Şeýlelikde, ispan topary ilkinji gezek Awstraliýanyň we Täze Zelandiýanyň toparlaryndan üstün gelmegi başardy.
Umuman, 14-15-nji iýul Ispan toparlary üçin şowly günleriň biri boldy. 14-nji iýuldan 15-nji iýula geçilen gije Ispaniýanyň milli ýygyndysy Angliýany utup, 4-nji gezek futbol boýunça Ýewropanyň çempiony boldy.
Şeýle hem 14-nji iýulda tennis boýunça “Uly tuwulga” ýaryşlarynyň Uimbledon tapgyry tamamlandy. Erkekleriň arasynda geçirilen bu ýaryşda ispan tennisçi Karlos Alkaraz ýeňiji boldy.
San-Fransisko şäheriniň aýlag kenarynda geçirilen ýelkenli sport ýaryşynda hem Ispaniýa bu ýaryşlaryň iň güýçli ýygyndylary bolan Awstraliýa we Täze Zelandiýany ýeňip, 4-nji möwsümiň çempiony boldy.
Ine, şeýle iri halkara ýaryşyň tomaşaçylarynyň hatarynda “Atawatan Media” topary hem boldy. Media toparymyz bu ýaryşyň geçýän pursatlaryny ýazgy etdi we ony biziň elektron hem-de jemgyýetçilik torlarymyzdaky platformalardan tomaşa etmek bolar.