Paýtagtymyz Aşgabatda Hytaý Halk Respublikasynyň sungat wekilleriniň gatnaşmagynda geçirilen «Ýüpek ýoly karnawaly – Bahar baýramy festiwaly» atly medeni çäre uly üstünlige beslendi.
Iki dostlukly ýurdy ajaýyp aýdym-sazlar bilen biri-birine has-da ýakynlaşdyran çäräniň çäginde Türkmenistanyň Döwlet çeperçilik akademiýasynda Şanhaý şäheriniň simfoniki orkestriniň Peking operasynyň aktýory, kollegrafiýa boýunça tanymal hünärmen Yeň Peň Doň mugallymlardyr talyplar üçin ussatlyk sapagyny geçirdi.
Ý.P.Doň bu sungatyň gelip çykyşynyň şekiller bilen bagly boldandygy, hatlary ýazmakda ulanylýan gurallar, reňkleriň taýýarlanylyşy, harplaryň manyly nyşany, çalasynlyk bilen ýerine ýetirilişi barada giňişleýin düşündirdi.
Ol ussatlyk sapagynyň soňunda atyň hem-de arabanyň şekil ýazgysyny gyzyl reňkli kagyzyň ýüzüne gara syýa bilen ýazyp görkezdi. Talyplar hytaýly hünärmeniň ýazyp görkezen şekillerini gysga wagtyň içinde çalasynlyk bilen gaýtalamagy başardylar.
Ý.P.Doň talyplaryň ukyp-başarnygyna ýokary baha berip, olara okuwda uly üstünlikleri arzuw etdi. Geljekde olaryň bu ugurda has-da kämillige gol berjekdiklerine uly ynam bildirdi.