Türkiýede ýene bir gündogar alymynyň heýkeli dikeldildi. Has takygy, 3-nji mart güni Ankara şäherinde gadymy gündogar alymy, belli matematik Muhammet al-Horezminiň ýadygärliginiň açylyş dabarasy boldy.
Şu ýyl TÜRKSOÝ halkara guramasy tarapyndan Özbegistanyň Hywa şäheri «Türk dünýäsiniň medeni paýtagty» diýlip yglan edildi. Bu ýadygärlik hem şu çäreleriň gurşawynda açyldy.
Özbek metbugatynyň ýazmagyna görä, ýadygärligiň açylyş dabarasyna Özbegistanyň Horezm welaýatynyň häkimi Farhod Ermonow hem gatnaşdy.
Heýkel Ankaranyň keçiören etrabyndaky meşhur seýilgähleriň birinde dikildi. Bu şäherde türkmen akyldary Magtymguly Pyragynyň hem heýkeliniň bardygyny ýatladýarys.
Muhammet al-Horezminiň hatyrasyna dikeldilen ýadygärligiň açylyş dabarasyndan soňra özbek milli lybaslarynyň görkezilişi boldy. Şondan soň dabaralara gatnaşyjylar «Men ― Jelaletdin» atly filme tomaşa etdiler.