24-nji oktýabrda Baku Crystal Hall-da 15 ýaşa çenli ýetginjekleriň arasynda ilkinji dünýä çempionatynyň we futbol festiwalynyň (FIFA U-15 World Cup and Festival) resmi açylyş dabarasy geçirildi.
Azerbaýjan Respublikasynyň Prezidenti Ilham Aliýew, birinji hanym Mehriban Aliýewa, olaryň maşgala agzalary we FIFA-nyň prezidenti Janni Infantino dabara gatnaşdylar.
Ilki bilen Prezident Ilham Aliýew, birinji hanym Mehriban Aliýewa we olaryň maşgala agzalary FIFA-nyň prezidenti Janni Infantino we beýleki myhmanlar bilen duşuşdylar.
Janni Infantino döwlet Baştutanyna ýadygärlik sowgatlaryny gowşurdy.
Açylyş dabarasy Azerbaýjan Respublikasynyň Döwlet gimniniň ýerine ýetirilmegi bilen başlandy.
Soňra FIFA U-15 dünýä çempionatyna we futbol festiwalyna bagyşlanan wideorolik görkezildi.
Çäräniň dowamynda çykyş eden Azerbaýjanyň Premýer-ministriniň orunbasary, Guramaçylyk komitetiniň başlygy Samir Şarifow 15 ýaşa çenli ýetginjekleriň arasynda ilkinji dünýä çempionatynyň we futbol festiwalynyň açylyş dabarasyna gatnaşýan myhmanlary gutlady.
Ol Azerbaýjanyň 189 ýurduň milli ýygyndylaryny bir ýere jemleýän bu uly göwrümli ýaryşy kabul edýändigini belledi. Samir Şarifow Azerbaýjanyň ýaryşy guramakda FIFA-nyň hyzmatdaşy bolup çykyş edýändigini nygtap, ýurduň bu ynama mynasyp görülendigi üçin futbolyň halkara ýolbaşçy edarasyna minnetdarlyk bildirdi.
Şeýle hem ol Prezident Ilham Aliýewe taryhda ilkinji gezek geçirilýän 15 ýaşa çenli ýetginjekleriň arasynda dünýä çempionatynyň gysga wagtyň içinde we ýokary standartlara laýyk derejede guralmagyny üpjün edendigi, bu başlangyjy durmuşa geçirmekde ýolbaşçylyk edendigi we aýgytly goldaw berendigi üçin minnetdarlyk bildirdi.
FIFA-nyň prezidenti Janni Infantino çykyşynda 15 ýaşa çenli ýetginjekleriň arasynda ilkinji dünýä çempionatynyň we futbol festiwalynyň tutuş dünýäni birleşdirýändigini belledi.
Ol Bakuda geçirilýän ýaryşa 3 müňden gowrak futbolçynyň we resmi wekiliň gatnaşýandygyny habar berdi. FIFA-nyň prezidenti ýaryşa gatnaşýan 189 topar bilen bir hatarda meýletinçileriň we işgärleriň hem ýaryşyň geçirilmegine uly goşant goşjakdygyny aýtdy.
Janni Infantino futbolçylara ýüzlenip, ýaryşdan lezzet almaga, adalatly göreşmäge, garşydaşlaryna hormat goýmaga we oýnuň düzgünlerini berjaý etmäge çagyrdy.
FIFA-nyň prezidenti Janni Infantino Prezident Ilham Aliýewe we Guramaçylyk komitetine bütin dünýäni bir ýere jemlemäge döredilen mümkinçilik üçin minnetdarlyk bildirdi. Ol Azerbaýjan bilen bilelikde ajaýyp taryhyň ýazyljakdygyny aýtdy.
Şondan soň FIFA U-15 dünýä çempionaty we futbol festiwaly resmi taýdan açyk diýlip yglan edildi.
Soňra dürli ýurtlara wekilçilik edýän toparlaryň agzalarynyň ýaryş baradaky täsirlerini görkezýän wideorolik görkezildi. Çäre çeper çykyşlar bilen dowam etdi.
Açylyş dabarasyndan soňra Döwlet Baştutany, birinji hanym, olaryň maşgala agzalary we FIFA-nyň prezidenti Azerbaýjan bilen Timor-Leste milli ýygyndylarynyň arasyndaky duşuşyga hem tomaşa etdiler.
Duşuşyk Azerbaýjanyň milli ýygyndysynyň 6:0 hasabyndaky ýeňşi bilen tamamlandy.