Şanhaý Hyzmatdaşlyk Guramasyna (ŞHG) agza döwletleriň Baştutanlary Bişkekde geçirilen sammitiň jemleri boýunça 28 resminama gol çekdiler.
Gyrgyz Respublikasynyň başlyklyk etmegine geçirilen ŞHG-niň Baştutanlarynyň hem-de “ŞHG+” sammitleri uly üstünliklere beslendi. Bu möhüm halkara çärelerine Belarusyň Prezidenti Aleksandr Lukaşenko, Hindistanyň Premýer-ministri Narendra Modi, Eýranyň Prezidenti Masud Pezeşkian, Gazagystanyň Prezidenti Kasym-Žomart Tokaýew, HHR-iň Başlygy Si Szinpin, Pakistanyň Premýer-ministri Şahbaz Şarif, Russiýanyň Prezidenti Wladimir Putin, Täjigistanyň Prezidenti Emomali Rahmon we Özbegistanyň Prezidenti Şawkat Mirziýoýew gatnaşdy.
Şeýle hem sammitde Azerbaýjanyň Prezidenti Ilham Aliýew, Ermenistanyň Premýer-ministri Nikol Paşinýan, Mongoliýanyň Prezidenti Uhnaagiýn Hurelsuh, Togonyň Ministrler geňeşiniň başlygy For Essosimna Gnassingbe, Türkiýäniň Prezidenti Rejep Taýýip Ärdoğan, Laosyň Prezidenti Thonglun Sisulit, Wýetnamyň wise-prezidenti Wo Thi An Suan we Müsüriň wise-premýer-ministri Huseýn Isa orun aldy.
Halkara guramalardan ŞHG-niň Baş sekretary Nurlan Ýermekbaýewyň, BMG-niň Baş sekretary Antoniu Guterrişiň, GDA-nyň Baş sekretary Sergeý Lebedewiň hem-de beýleki käbir guramalaryň ýolbaşçylarynyň gatnaşandygyny belelmek gerek.
Liderler ŞHG-niň 25 ýyllygyna bagyşlanan Bişkek Jarnamasyna; 2026–2028-nji ýyllarda halkara maglumat howpsuzlygyny üpjün etmek meseleleri boýunça ŞHG-ä agza döwletleriň özara hyzmatdaşlyk Meýilnamasyna; 2026–2030-njy ýyllarda ŞHG-ä agza döwletleriň portlaryny we logistika merkezlerini ösdürmek boýunça Hereketler meýilnamasyna gol çekdiler.
Şeýle hem ŞHG-ä agza döwletleriň Baştutanlarynyň Geňeşiniň Jarnamasyna, Lahor şäherini (Pakistan) 2026–2027-nji ýyllarda ŞHG-niň syýahatçylyk we medeni paýtagty diýip yglan etmek baradaky resminama, şeýle hem başga-da birnäçe resminama gol çekildi.
Çärýek asyryň dowamynda Şanhaý Hyzmatdaşlyk Guramasy hakykatdan-da uly ösüş ýoluny geçdi. 2001-nji ýylda alty döwletiň — Russiýanyň, Hytaýyň, Gazagystanyň, Gyrgyzystanyň, Täjigistanyň we Özbegistanyň başlangyjy bilen döredilen bu gurama geçen ýyllaryň dowamynda pugtalandy we ösdi hem-de kemala gelýän köppolýarly dünýäniň özbaşdak we täsirli merkezleriniň birine öwrüldi.
Gurama gatnaşyjy döwletleriň düzümi hem ep-esli giňeldi. 2017-nji ýylda ŞHG-niň hataryna Hindistan bilen Pakistan, 2023-nji ýylda Eýran, 2024-nji ýylda bolsa Belarus goşuldy. Şeýle hem synçy döwletler — Owganystan we Mongoliýa, şeýle-de dialog boýunça hyzmatdaş 15 ýurt Şanhaý Hyzmatdaşlyk Guramasynyň işine işjeň gatnaşýarlar.
Häzirki wagtda ŞHG diňe bir umumy Ýewraziýa yklymymyzda däl, eýsem tutuş dünýäde-de iň iri sebit birleşmesi bolup durýar. Gurama agza ýurtlarda dünýä ilatynyň tas ýarysy ýaşaýar we dünýäniň jemi içerki önüminiň üçden birinden gowragy öndürilýär.