Baku şäherinde iki ýurduň arasynda syýahatçylyk hyzmatdaşlygyny ösdürmäge gönükdirilen bilelikdäki gazak-azerbaýjan syýahatçylyk operatory “TurAn” (TourAN) resmi taýdan işe girizildi diýip, Azerbaýjanyň metbugaty habar berýär.
Dörediji resminamalar Gazagystanyň Azerbaýjandaky ilçihanasynyň binasynda gol çekildi.
Täze syýahatçylyk operatorynyň esaslandyryş maýasy 100 müň ABŞ dollary bolup, paýlar taraplaryň arasynda deň paýlandy. Kompaniýanyň işi giň gerimli syýahatçylyk hyzmatlaryny, şol sanda ekologiýa syýahatçylygy, medeni we gastronomiýa syýahatlary, şeýle hem lukmançylyk we işewürlik syýahatçylygyny öz içine alar.
Gazagystanyň Azerbaýjandaky ilçisi Alim Baýel, bitewi syýahatçylyk operatorynyň döredilmeginiň ikitaraplaýyn hyzmatdaşlygy has-da pugtalandyrjakdygyny we sebiti bitewi syýahatçylyk ugry hökmünde halkara derejesinde has özüne çekiji etjekdigini belledi.
Diplomat 2024–2025-nji ýyllarda Gazagystanyň Bakudaky ilçihanasy tarapyndan pudagara hyzmatdaşlygy ösdürmek maksady bilen iki sany gazak-azerbaýjan syýahatçylyk forumynyň geçirilendigini ýatlatdy. Üçünji forum 2026-njy ýylda Türküstanda geçiriler.
Häzirki wagtda Gazagystan bilen Azerbaýjanyň arasynda ösen howa gatnawy bar. Göni uçuşlaryň umumy sany hepdede 30-dan geçýär.
“TurAn”-yň işe girizilmeginiň iki ýurduň syýahatçylyk pudagynyň ösüşinde möhüm ädim bolmagyna, maýa goýum işjeňliginiň artmagyna we halkara bazarlarda bilelikdäki syýahatçylyk önümleriniň döredilmegine ýardam bermegine garaşylýar.
Taslama syýahatçylyk bazarlarynda tejribesi bolan we halkara taslamalary amala aşyrýan “Discover Jetisu” (Gazagystan) hem-de “Smile Azerbaijan Tour” (Azerbaýjan) kompaniýalarynyň bilelikdäki tagallalary bilen amala aşyryldy.