2026-njy ýylyň 26-njy fewralynda Türkmenistanyň daşary işler ministri Raşid Meredowyň Beýik Britaniýanyň Daşary işler, Arkalaşyk we ösüş meseleleri boýunça ministri hanym Iwett Kuper bilen ikitaraplaýyn duşuşygy geçirildi. Duşuşyga Ýewropa, Demirgazyk Amerika we deňiz aňyrsy çäkleri boýunça ministr Stiwen Dauti hem gatnaşdy.
Gepleşikleriň dowamynda ikitaraplaýyn hyzmatdaşlygyň, sebit gün tertibiniň we möhüm halkara meseleleriniň giň gerimi ara alnyp maslahatlaşyldy. «Merkezi Aziýa — Beýik Britaniýa» formatyndaky ilkinji ministrler derejesindäki duşuşygyň ähmiýeti bellenildi we taraplaryň ony amaly mazmun bilen baýlaşdyrmaga taýýardyklary tassyklanyldy.
Türkmenistan ähli halkara meselelerini halkara hukugynyň kadalaryna we BMG-niň Tertipnamasyna esaslanyp, diňe parahatçylykly, syýasy-diplomatik serişdeler we usullar arkaly çözmäge ygrarlydygyny tassyklady.
Ykdysady hyzmatdaşlygy ösdürmegiň, şol sanda ýaşyl tehnologiýalar, sanlylaşdyrmak we ulag ulgamlaryndaky meselelere, şeýle hem medeni-ynsanperwer gatnaşyklary giňeltmäge garaldy.
Söhbetdeşligiň ahyrynda taraplar türkmen-britan hyzmatdaşlygyň mundan beýläk-de berkidilmegine gyzyklanma bildirýändiklerini tassykladylar we ýokary derejeli saparlary guramagyň geljegini ara alyp maslahatlaşdylar.
Soňra Beýik Britaniýanyň daşary syýasat edarasynyň ýolbaşçysy Iwett Kuperiň adyndan Merkezi Aziýa ýurtlarynyň we Birleşen Patyşalygyň daşary işler ministrleriniň iş nahary boldy.
Iş nahary sebit hyzmatdaşlygy, şol sanda howpsuzlygy üpjün etmek, durnukly ösüş we sebitara özara gatnaşyklary berkitmek meselelerini ara alyp maslahatlaşmaga bagyşlandy.
Türkmenistanyň daşary işler ministri Raşid Meredow öz çykyşynda amaly hyzmatdaşlygy ösdürmäge we sebit howpsuzlygyny berkitmäge gönükdirilen birnäçe anyk başlangyçlary, şol sanda bilelikdäki okuw maksatnamalaryny durmuşa geçirmegi we «Türkmenistan — Beýik Britaniýa medeni gepleşigi» atly täze formaty döretmegi teklip etdi.
Owganystanyň parahatçylykly ösüşine düzümleýin taslamalary, şol sanda TAPI gaz geçirijisini, elektrik geçiriji ulgamlary we owgan ugruna tarap demir ýollaryň gurluşygyny amala aşyrmak arkaly ýardam bermegiň möhümligi nygtaldy.
Şeýle hem ministr britan hukuk we konsalting kompaniýalaryny çekmek bilen tehniki we maslahat beriş hyzmatdaşlygyny giňeltmegi, serhetüsti söwdanyň aýdyňlygyny üpjün etmek üçin sanly çözgütleri ornaşdyrmagy teklip etdi.
Sebitiň durnuklylygyny we durnukly ösüşini berkitmek maksady bilen, Beýik Britaniýanyň tehnologik kuwwatyny we Merkezi Aziýa ýurtlarynyň diplomatik tagallalaryny birleşdirmegiň ähmiýeti bellenildi.