«MaxFlight» «Türkmenhowaýollary» awiakompaniýasynyň Russiýa Federasiýasyndaky agenti bolup durýar. Täze açylan Balkanabat Halkara howa menzili dürli uçarlara, esasan-da, «Wolga-Dnepr», «Awiatrans», «Awiastar-TU» ýaly rus awiakompaniýalarynyň ýük uçarlaryna tehniki gonuşlary amala aşyrmaga mümkinçilik berer. Bu barada «MaxFlight» kompaniýasynyň ýük daşamalar boýunça direktory Wladislaw Wolžanin “Türkmenistan” gazetine beren beýanatynda belläp geçdi.
Ol bu barada hususan-da şeýle diýdi:
– Türkmenistanyň geografik taýdan örän amatly ýerleşmegi Aziýadan, Afrikadan, Hindistandan uçuşlary kabul etmäge oňyn şertleri döredýär. Aerodrom gulluklarynyň, uçarlaryň ýerüsti hem-de tehniki gullugynyň binalaryny-da öz içine alýan täze howa menzili bolsa hut tehniki gonuşlary ýerine ýetirmek üçin bähbitli bolup durýar. Umuman, bu döwrebap desga bilen baglylykda, biziň kompaniýamyzyň esasy maksady şundan ybarat.