Gruziýanyň Premýer-ministri Irakliý Kobahizde iki ýurduň arasyndaky ikitaraplaýyn gatnaşyklary pugtalandyrmaga gönükdirilen resmi sapar bilen Türkmenistanyň paýtagty Aşgabada geldi. Aşgabadyň halkara howa menzilinde Premýer-ministr we onuň wekiliýet agzalary üçin resmi garşylamak dabarasy guraldy.
Belent mertebeli myhmany Türkmenistanyň Ministrler Kabinetiniň Başlygynyň orunbasary Nökerguly Atagulyýew garşy aldy.
Gruziýanyň Hökümetiniň metbugat gullugynyň habar bermegine görä, Premýer-ministr Kobahizde Türkmenistanyň Prezidenti Serdar Berdimuhamedow bilen duşuşar.
Şeýle hem saparyň maksatnamasynyň çäklerinde iki ýurduň wekiliýet agzalarynyň gatnaşmagynda giňişleýin düzümde gepleşikler geçiriler. Bu gepleşikler Gruziýanyň birinji wise-premýeriniň we Türkmenistanyň Ministrler Kabinetiniň Başlygynyň orunbasarynyň başlyklyk etmeginde guralar.
Bu gepleşikleriň jemleri boýunça dürli ugurlarda hyzmatdaşlyk etmek boýunça birnäçe ylalaşyklara gol çekiler.
Mälim bolşy ýaly, Gruziýanyň Premýer-ministri Irakliý Kobahizde Türkmenistana saparyndan ozal, Özbegistan Respublikasynda resmi saparda boldy.