Ozal hem habar berşimiz ýaly, Eýran Yslam Respublikasynyň Ýol we şähergurluşyk ministri Mehrdad Bazrpaşyň ýolbaşçylygyndaky wekiliýet ýurdumyzda saparda boldy. Bu wekiliýetiň agzalary Aşgabatda Ykdysady hyzmatdaşlyk boýunça bilelikdäki türkmen-eýran toparynyň 17-nji mejlisine we EYR-nyň «Iran Prože» atly Ýöriteleşdirilen sergisine gatnaşdylar.
Şeýle hem Ykdysady hyzmatdaşlyk boýunça türkmen-eýran Hökümetara toparynyň başlyklary R.Meredow bilen M.Bazrpaşanyň ýolbaşçylygynda duşuşyk geçirildi.
“Watan” habarlar gepleşiginde bellenilip geçilişi ýaly, Ykdysady hyzmatdaşlyk boýunça bilelikdäki türkmen-eýran toparynyň 17-nji mejlisiniň jemleri boýunça birnäçe ylalaşyklara gol çekildi.
Mejlisiň netijeleri boýunça aşakdaky resminamalara gol çekildi:
– Mary (Türkmenistan) – Maşat (Eýran) elektrik geçirijisiniň türkmen böleginiň gurluşygynyň maliýeleşdirilmegini ýola goýmak hakynda «Türkmenenergo» döwlet elektroenergetika korporasiýasynyň, «Tawanir» kompaniýasynyň we «Sanergy Pishro Export and Energy Promotion» kompaniýasynyň arasynda Çarçuwaly Ylalaşyk;
– Awtomobil ýollarynyň gurluşygyny dolandyrmak baradaky döwlet agentligi bilen Eýran Yslam Respublikasynyň Ýol we şäher gurluşyk ministrliginiň arasynda «Gumdag-Etrek-Eýran serhedi» awtomobil ýoluny gurmak barada Hyzmatdaşlyk hakynda Ähtnama;
– Ykdysady hyzmatdaşlyk boýunça bilelikdäki türkmen-eýran toparynyň on ýedinji mejlisiniň Teswirnamasy.