Türkmenistanyň döwlet ministri, “Türkmengaz” döwlet konserniniň başlygy Maksat Babaýewiň ýolbaşçylygyndaky türkmen wekiliýeti Bagdatda Yragyň Premýer-ministri Muhammet S. Al-Sudani bilen duşuşdy.
“Duşuşykda iki ýurduň arasyndaky ikitaraplaýyn gatnaşyklary, olary ösdürmegiň strategiýalaryny we energiýa we gaz pudaklarynda hyzmatdaşlygy ösdürmek meselesini ara alyp maslahatlaşdylar. Netijede, elektrik stansiýalarynyň gaz zerurlyklaryny kanagatlandyrmak boýunça Türkmenistandan Yraga tebigy gaz ibermek babatda bilelikdäki ähtnama gol çekildi “-diýlip, metbugat beýanatynda bellenilip geçilýär.
Premýer-ministr Al-Sudani Elektrik energetika ministrligi bilen “Türkmengaz” döwlet konserniniň arasynda gaz üpjünçiligi barada özara düşünişmek hakynda ähtnama gol çekilmegi bilen gutlady.
Yragyň wekiliýetiniň şertnamalary tamamlamak üçin 25-nji oktýabrda Türkmenistana sapar bilen barjakdygy bellenildi.
Öz gezeginde türkmen wekiliýeti Premýer-ministr Al-Sudanä Türkmenistanyň Prezidentiniň mähirli salamyny ýetirip, Türkmenistanyň Yrak bilen dürli ugurlarda hyzmatdaşlygy giňeltmäge taýýardygy bellenildi.
Yragyň Türkmenistandan tebigy gaz import etmegi ýurduň hökümetiniň tebigy gazy import etmegiň ugurlaryny diwersifikasiýalaşdyrmak hem-de elektrik stansiýalaryň tebigy gaza bolan durnukly üpjünçiligini üpjün etmek strategiýasynyň bir bölegi bolup durýandygy bellenildi.