Berkarar döwletiň täze eýýamynyň Galkynyşy döwründe il-ýurt bähbitli döwletli işler yzygiderli amala aşyrylýar. Ýurdumyzyň durmuşyndaky taryhy wakalara gözli şaýat bolýandygymyz üçin biz özümizi örän bagtly nesil hasaplaýarys.
Ýurdumyzyň ykdysady ösüşinde obasenagat toplumyna möhüm ornuň degişlidir. Ýer serişdelerini rejeli we netijeli ulanmak boýunça geçirilýän maksatnamalaýyn işler amala aşyrylýar. Eziz Diýarymyzda oba hojalygyna goldaw bermegiň ugurlaryny yzygiderli kämilleşdirmegiň we giňeltmegiň, ekerançylygy, maldarçylygy yzygiderli ösdürmek boýunça taslamalary üstünlikli durmuşa geçirmek ugrunda giňden tagalla edilýär.
Umuman, bu işler azyk howpsuzlygynyň berkidilmegini, ýurdumyzyň eksport kuwwatynyň pugtalandyrylmagyny, daşary döwletlerden getirilýän harytlaryň ornuny tutýan önümçiligiň ösdürilmegini üpjün etmäge saldamly goşant goşýar.
Ýaňy-ýakynda hormatly Prezidentimiziň başlyklyk etmeginde geçirilen Ministrler Kabinetiniň sanly ulgam arkaly geçirilen mejlisinde hem ministrliklere, pudaklaýyn dolandyryş edaralaryna, häkimliklere hem-de olaryň garamagyndaky edara-kärhanalara gurluşyk hem-de önümçilik maksatlary üçin jemi 10 müň 545,22 gektar ýer böleklerini hemişelik we wagtlaýyn peýdalanmaga bermek boýunça işlenip taýýarlanylan teklipler hödürlenildi.
Ýurdumyzda ýerlerden rejeli we netijeli peýdalanmak, olaryň goralyşyna döwlet gözegçiligini has-da güýçlendirmek hem-de ýer kadastrynyň alnyp barylmagyny kämilleşdirmek maksady bilen «Döwlet ýer kadastry hakynda» Türkmenistanyň Kanuny hereket edýär.
Ýer kadastrynyň alnyp barylmagy geomaglumat ulgamyny peýdalanmak bilen, ýurdumyzyň suwarymly ekerançylyk meýdanlary we onuň topraklary hem-de ekinleriň görnüşleri baradaky maglumatlary ýeriň emeli hemrasyndan alnan suratlaryň esasynda düzülen sanly elektron kartalaryna geçirmäge mümkinçilikleri döredýär.
Häzirki wagtda ýurdumyzda tebigaty goramak, suw, ýer we biologik serişdeleri rejeli peýdalanmak boýunça iri möçberli çäreler durmuşa geçirilýär. Munuň şeýledigine ýurdumyzda alnyp barylýan ekologiýa syýasatynyň Türkmenistanyň Tokaý kodeksiniň, «Ekologiýa howpsuzlygy hakynda», «Ozon gatlagyny goramak hakynda», «Döwlet ýer kadastry hakynda», «Aýratyn goralýan tebigy ýerler hakynda», «Ösümlik dünýäsi hakynda» Türkmenistanyň Kanunlarynyň talaplaryna laýyklykda guralmagy hem aýdyň şaýatlyk edýär.
Ýerden rejeli peýdalanmak babatdaky kanunçylygyň döwrebaplaşdyrylmagy hem-de ýurdumyzda telekeçileriň we hususyýetçileriň oba hojalygyna giňden çekilmegi ýerleriň melioratiw ýagdaýyny gowulandyrmaga, pes hasyl berýän ýerleriň hasyllylygyny dikeltmäge, ekin dolanyşygyny ylmy esasda alyp barmaga, agrotehniki çäreleri öz wagtynda ýokary hilli geçirmäge, suw tygşytlaýjy tehnologiýalary önümçilige giňden ornaşdyrmaga hem-de iş orunlarynyň döredilmegine ýardam berýär.
Önüm öndürijileriň bugdaý, gowaça we beýleki oba hojalyk ekinlerini ösdürip ýetişdirmek boýunça şertnamalaýyn borçnamadan artyk öndüren önümleri «Oba hojalyk maksatly ýörite ýer gaznasynyň möçberini tassyklamak hakynda» Türkmenistanyň Prezidentiniň degişli Kararyna laýyklykda, olaryň öz ygtyýarlygyna galdyrylýar. Şeýle hem şertnamalaýyn borçnamadan artyk öndürilen önümler olaryň öz islegine görä erkin bahalardan özbaşdak ýerlemäge ýa-da döwlet satyn alyş nyrhyndan döwlete tabşyrmaga hukuk berilmegi daýhanlara ýerden bol hasyl almaga itergi berdi hem-de oba hojalyk ekinleriniň eksport mümkinçiliginiň artmagyna ýardam etdi.