Geçen hepdäniň ahyrynda Wengriýanyň Babolna şäherinde ata watany Türkmenistan bolan ahalteke atlarynyň görkezme çykyşlary we at çapyşyklary geçirildi. Bu barada “Hungary Today” neşiri habar berýär.
Bu çäre bedewleriň ajaýyp hem-de iň gadymy görnüşleriniň birine bagyşlandy. Wengriýanyň oba hojalyk ministri Iştwa Nad öz çykyşynda ahalteke bedewleriniň taryhy ähmiýeitni belläp, bu atlarynyň görnüşiniň Wengriýada ýitip gitmeginiň öňüni almak ugrunda tagalla ediljekdigini belledi.
Ol Wengriýada atly sportuň ösdürilmegine, atçylyk pudagynyň we bu ugurda ýaş hünärmenleri taýýarlamaga döwlet tarapyndan goldaw beriljekdigini belledi.
Wengriýanyň ahalteke atlarynyň assosiasiýasynyň ýolbaşçysy Ýusef Nýeki bolsa, bu gezekki çärä 11 döwletden 59 sany arassa ganly atyň gatnaşýandygyny belledi.
Emin agzalarynyň atlaryň erkin hereketleri, şeýle hem dürli häsiýetli aýratynlyklaryna baha berdiler.
Wenger atçylyk toplumlarynda ahalteke atlarynyň bar bolmagy öz gözbaşyny XIX asyrdan alyp gaýdýar. 1970-nji ýyllarda 3 sany at bilen ahalteke atçylygy döredildi. Şondna bäri olaryň baş sanyny köpletmek ugrunda giň tagallalar edilýär.
Ahalteke bedewleri – türkmen halkynyň buýsanjy we ýurduň esasy baýlyklarynyň biridir. Arassa ganly ahalteke bedewleriniň 5 müň ýyllyk taryhy bar. Türkmenistan döwletimiz ahalteke bedewleriniň taryhy Watany bolup, ýurdumyzda atçylyk pudagy kämil derejede ösdürilýär.