Şu gün Arkadag şäheriniň çäginde ýerleşýän Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasyna ukrain döwletinden hoşallyk hatlary gelip gowuşdy. Bu çärä Türkmenistanyň Ministrler Kabinetiniň Başlygynyň orunbasary, daşary işler ministri, Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň Müdiriýet agzalary, Arkadag şäheriniň häkimi, köpçülikleýin habar beriş serişdeleriniň ýolbaşçylary, şeýle hem Ukrainanyň Türkmenistandaky Adatdan daşary we Doly ygtyýarly ilçisi gatnaşdy. Bu barada Türkmenistanyň Maslahatynyň resmi saýtynda bellenilip geçilýär.
Hoşallyk hatynda bellenilişi ýaly, ýurdumyzyň Saglygy goraýyş we derman senagaty ministrliginden, Dokma senagaty ministrliginden hem-de Senagatçylar we telekeçiler birleşmesinden iberilen degişli derman we saglygy goraýyş maksatly serişdeler, harytlar hem-de azyk önümleri ynsanperwer kömegi hökmünde Ukrainanyň çagalaryna ýetirildi.
Ukrainanyň Türkmenistandaky Adatdan daşary we Doly ygtyýarly ilçisi hoşallyk sözi bilen çykyş edip, ol türkmen halkynyň Milli Liderine, hormatly Prezidentimize ukrain halkynyň adyndan özüniň sagbolsunyny aýtdy. Hemişe dostluk goluny uzadýan türkmen halkynyň Ukraina döwletine iberen ynsanperwerlik kömegi bu belent adamkärçiligiň ajaýyp nusgasyny görkezýär.
Ilçi Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasyna ukrain döwletiniň adyndan iberilen Hoşallyk hatlary bilen birlikde, dostlukly ýurduň birnäçe etraplaryna Türkmenistandan iberilen ynsanperwer kömeginiň, şol sanda dokma hem-de azyk önümleriniň ukrain çagalary tarapyndan aýratyn hoşallyk we şatlyk bilen kabul edýän pursatlaryndan düşürilen fotosuratlary gowşurdy.
Hatlary iberenler “Belozerskoýe hassahanasy” täjirçilik bolmadyk Jemagat kärhanasynyň baş lukmany, “Ohmatdet” milli ýöriteleşdirilen çagalar hassahanasynyň baş direktory we beýlekiler özleriniň çuňňur hoşallyklaryny beýan edipdirler.