«Awaza» milli syýahatçylyk zolagynda Birleşen Milletler Guramasynyň Deňze çykalgasy bolmadyk ösüp barýan ýurtlar boýunça üçünji maslahatynyň çäginde Türkmenistanyň Mejlisiniň Başlygy D.Gulmanowa bilen Özbegistan Respublikasynyň Oliý Mažlisiniň Senatynyň Başlygy T.Narbaýewanyň duşuşygy geçirildi.
Duşuşykda iki ýurduň döwlet ýolbaşçylarynyň yzygiderli tagallalary netijesinde hil taýdan täze derejä çykarylýan türkmen-özbek gatnaşyklarynyň çäklerinde parlamentara hyzmatdaşlygynyň netijeli dowam etdirilýändigi kanagatlanma bilen bellenildi. Munuň şeýledigine ýurtlaryň wekiliýetleriniň birek-biregiň ýurdunda geçirilýän halkara ähmiýetli çärelere işjeň gatnaşmaklary, köptaraplaýyn dialoglaryň çäklerinde hyzmatdaşlyk edilmegi-de aýdyň şaýatlyk edýär. Taraplaryň nygtaýşy ýaly, şeýle çäreleriň we saparlaryň guralmagy parlamentara gatnaşyklary ösdürmäge, özara tagallalary utgaşdyrmaga, syýasy- diplomatik, söwda-ykdysady, medeni-ynsanperwer ugurlar boýunça ýurtlaryň arasyndaky hyzmatdaşlyk gatnaşyklaryny pugtalandyrmaga ýardam edýär. Şeýle hem ikitaraplaýyn esasda döredilen parlamentara dostluk toparlarynyň kanunçykaryjylyk işinde we parlament diplomatiýasyny ösdürmekde tejribe alyşmaga mümkinçilikleri artdyrýandygy aýratyn bellenildi.
Hazaryň ajaýyp türkmen kenaryndaky “Awaza” milli syýahatçylyk zolagyndaky halkara maslahat we onuň çäklerinde geçirilen Parlament forumynyň halklaryň arasyndaky dost-doganlyk gatnaşyklary mundan beýläk-de ösdürmekde ähmiýetiniň uly boljakdygy nygtaldy.