Täjigistanyň paýtagty Duşanbe şäherinde Türkmenistanyň Ministrler Kabinetiniň Başlygynyň orunbasary, daşary işler ministri Raşid Meredow bilen Täjigistanyň daşary işler ministri Sirojiddin Muhriddiniň arasynda gepleşikler geçirildi.
Täjigistanyň Daşary işler ministrliginiň habar bermegine görä, duşuşykda ministrler türkmen-täjik gatnaşyklarynyň syýasy, ykdysady, ynsanperwer we beýleki ugurlardaky möhüm meselelerini jikme-jik ara alyp maslahatlaşdylar, sebit we halkara guramalarynyň çäginde iki ýurduň arasyndaky gatnaşyklar barada pikir alyşdylar.
2023-nji ýylyň aprel aýynyň birinji ýarymynda meýilleşdirilýän Türkmenistan Prezidentiniň Täjigistan Respublikasyna döwlet saparyna taýýarlyk işlerine aýratyn üns berildi.
Daşary syýasat edaralarynyň ýolbaşçylary 2023-nji ýylyň sentýabr aýynda Duşanbe şäherinde geçiriljek Merkezi Aziýa döwletleriniň Baştutanlarynyň Konsultatiw duşuşygynyň 5-nji ýubileý sammitine we Araly halas etmegiň Halkara gaznasyny esaslandyryjy döwletleriň Baştutanlarynyň sammitine taýýarlyk işleri boýunça pikir alyşdylar.