Türkmenistanyň Prezidenti Gurbanguly Berdimuhamedow Täjigistanyň paýtagty Duşanbe şäherinde geçiriljek Şanhaý Hyzmatdaşlyk Guramasyna (ŞHG) agza ýurtlaryň döwlet Baştutanlarynyň sammitine hormatly myhman hökmünde gatnaşar. Bu barada “Watan” habarlar gepleşiginde bellenilip geçildi.
Ministrler Kabinetiniň sanly ulgam arkaly geçirilen mejlisinde hormatly Prezidentimiziň ŞHG-niň sammitine gatnaşmagyna görülýän taýýarlyk barada hasabat berildi. Saparyň maksatnamasynyň çäklerinde hormatly Prezidentimiz ikiçäk duşuşyklary hem geçirer.
Döwlet Baştutanymyz hasabaty diňläp, Bitarap Türkmenistanyň gyzyklanma bildirýän daşary ýurtly hyzmatdaşlar bilen köp ugurly hyzmatdaşlygyň strategiýasyny durmuşa geçirmek bilen, oňyn sebit we ählumumy gatnaşyklary işjeňleşdirmäge anyk goşant goşjakdygyny belledi.
Milli Liderimiz ŞHG-niň sammiti barada aýtmek bilen, türkmen tarapynyň şeýle forumlara yzygiderli gatnaşmagynyň iri halkara guramalar bilen netijeli gatnaşyklayr pugtalandyrmaga ýardam berýändigini belledi.
Täjigistanyň paýtagty Duşanbe şäherinde ertir, ýagny 17-nji sentýabrda Şanhaý Hyzmatdaşlyk Guramasynyň ýubileý mejlisi geçiriler. Şanhaý Hyzmatdaşlyk Guramasy Hytaý, Gazagystan, Gyrgyzystan, Russiýa, Täjigistan, Özbegistan, Hindistan we Päkistan ýaly sekiz sany hemişelik agzadan ybarat. Owganystan, Belarus, Eýran we Mongoliýa bu guramanyň synçy agzalygyna eýe. Ermenistan, Azerbaýjan, Kamboja, Nepal, Şri-Lanka we Türkiýe 2008-nji ýyldan bäri dialog boýunça hyzmatdaşlary.