Türkmenistanyň Döwlet howpsuzlyk geňeşiniň 12-nji awgustda geçirilen mejlisinde Prezident Gurbanguly Berdimuhamedow goranmak ministri B.Gündogdyýewiň ünsüni serkerdeleriň hünär taýýarlygyny güýçlendirmäge çekdi.
TDH-nyň habarynda hem nygtalyşy ýaly, Türkmenistanyň Ýaragly Güýçleriniň Belent Serkerdebaşysy ýokary hünär okuw mekdeplerinde serkerdeleriň hünär taýýarlygy ulgamyny kämilleşdirmegi ilkinji nobatdaky wezipeleriň hatarynda görkezdi. Şunuň bilen baglylykda, döwlet Baştutany ýaşlaryň arasynda düşündiriş işlerini hem-de sport ýaryşlaryny guramak barada ministre anyk tabşyryklary berdi.
Türkmenistanda harby serkerdeleri taýýarlaýan ýokary okuw mekdepleriniň birnäçesi hereket edýär. Olardan Beýik Saparmyrat Türkmenbaşy adyndaky Harby instituty we Harby deňiz instituty gönüden-göni Goranmak ministrliginiň garamagyndadyr. Şeýle hem ýurtda iki sany harby mekdebiň hem hereket edýändigini aýtmak gerek.
Ministrligiň Merkezi goşun sport klubynyň harby türgenleri bolsa ýurt we halkara derejesinde geçirilýän ýaryşlarda öňdebaryjylaryň hatarynda. Ýurdumyza belli, halkara ýaryşlarda üstünlikli çykyş edýän türgenlerimiziň aglabasy harby gullugyny şu klubda geçdi.