Şu gün Gazagystan Respublikasynda döwlet saparynda bolýan Türkmenistanyň Prezidenti Serdar Berdimuhamedowa Gazagystan Respublikasynyň ýokary sylagy — “Altyn Bürgüt” («Altyn Kyran») ordeni bilen sylaglamak dabarasy boldy.
Gazagystan Respublikasynyň Prezidenti Kasym-Žomart Tokaýew iki ýurduň we olaryň doganlyk halklarynyň arasyndaky dostluk, hoşniýetli goňşuçylyk gatnaşyklarynyň hem-de özara bähbitli hyzmatdaşlygyň pugtalandyrylmagyna goşan ägirt uly şahsy goşandy üçin Türkmenistanyň Prezidenti Serdar Berdimuhamedowa “Altyn Bürgüt” ordenini gowşurmagyň özi üçin uly hormatdygyny belledi.
“Siz Türkmen halkynyň milli Lideri, hormatly Gurbanguly Berdimuhamedowyň geljegi nazarlaýan strategik ýoluny ynamly dowam etdirýärsiňiz. Siziň döredijilikli ýolbaşçylygyňyz astynda Türkmenistan ykdysady ösüşiň täsirli dinamikasyny görkezýär. Siziň ýurduňyzda senagatyň, ulag infrastrukturanyň işjeň döwrebaplaşdyrylmasy dowam edýär. Energetika kuwwatyny pugtalandyrmak we tehnologik özgerlişik boýunça uly işler alnyp barylýar. Siziň öňdengörüjilikli başlangyçlaryňyz netijesinde doganlyk Türkmenistanda giň gerimli durmuş taslamalary meýilnamalaýyn amala aşyrylýar, ylym-bilim ulgamy yzygiderli ösýär, raýatlaryň hal-ýagdaýy yzygiderli ýokarlanýar. Bularyň hemmesi hakyky hormat goýýar we iň ýokary baha mynasypdyr” – diýip, Gazagystanyň Prezidenti aýtdy.
Türkmenistanyň Prezidenti Kasym-Žomart Tokaýewe we Gazagystanyň ähli doganlyk halkyna iň ýokary döwlet sylagyny gowşurandygy üçin minnetdarlyk bildirdi.
“Men bu sylagy Türkmenistanyň halkyna ýokary hormatyň alamaty, biziň halklarymyzy asyrlaryň dowamynda birleşdirýän berk dostlugyň we hoşniýetli goňşuçylygyň subutnamasy hasaplaýaryn. Biziň halkara giňişlikde ýakyn we netijeli hyzmatdaşlygymyz sebit we ählumumy gün tertibinde duran möhüm meseleleri çözmekde özara düşünişmegiň, raýdaşlygyň we özara goldawyň ýokary derejesini aýdyň görkezýär” – diýip, Türkmenistanyň Prezidenti aýtdy.