Türkmenistanyň Prezidenti Serdar Berdimuhamedow jenap Donald Trampa ABŞ-nyň Prezidenti wezipesine saýlanmagy mynasybetli tüýs ýürekden gutlaglaryny iberdi. Bu barada “Watan” habarlar gepleşiginde bellenilip geçilýär.
Hususan-da bu Gutlag hatynda şeýle diýilýär:
– Türkmenistan ABŞ bilen gatnaşyklarynyň häzirki derejesine ýokary baha berýär hem-de ikitaraplaýyn hyzmatdaşlygyň däp bolşy ýaly, deňhukuklylyk, birek-birege hormat goýmak we özara bähbitleri goramak ýörelgeleri esasynda mundan beýläk-de ösdürilmegine uly ähmiýet bildirýär. Ýurtlarymyzyň arasyndaky dostluk, özara ynanyşmak we gyzyklanma bildirilýän hyzmatdaşlyk gatnaşyklarynyň geljekde-de iki ýurduň halklarynyň bähbidine pugtalandyryljakdygyna berk ynam bildirýärin.
Türkmenistanyň Prezidenti mümkinçilikden peýdalanyp, Prezident Donald Trampa tüýs ýürekden berk jan saglyk, bagtyýarlyk hem-de Amerikanyň Birleşen Ştatlarynyň mundan beýläk-de gülläp ösmeginiň bähbidine ýokary döwlet wezipesinde uly üstünlikleri arzuw etdi.
Mälim bolşy ýaly, ABŞ-da geçirilen Prezident saýlawlarynda Respublikan partiýasynyň dalaşgäri Donald Tramp ýeňiş gazanyp, 60-njy gezek geçirilen saýlawlaryň netijesinde ABŞ-nyň 47-nji Prezidenti wezipesine saýlandy.
Ol mundan ozal, 2017-2021-nji ýyllarda ABŞ-nyň 45-nji Prezidenti wezipesini ýerine ýetiripdi.