Russiýa Federasiýasynyň Türkmenistandaky ilçihanasynyň gurnamagynda nobatdaky ýörite uçar gatnawyny amala aşyrmak göz öňünde tutulýar. Bu gatnawyň 25-nji fewralda Türkmenabat-Moskwa ugry boýunça ýerine ýetirilmegi meýilleşdirilýär. Bu barada Russiýanyň ilçihanasynyň “Telegram” jemgyýetçilik torunda mälim edilýär.
Ilçihananyň jemgyýetçilik torunda ýerleşdirilen beýanatda, 25-nji fewralda Türkmenabat-Moskwa ugry boýunça ýerine ýetiriljek gatnaw üçin awiapetekleriň satuwynyň 22-nji fewralda sagat 10:00-da başlanjakdygy bellenilýär. Awiapetekleri “S7” awiakompaniýasynyň Aşgabatdaky wekilhanasynda satylyp başlanjakdygy mälim edilýär.
Bu ýörite gatnaw koronawirus ýokanjy bilen baglanyşykly girizilen çäklendirmeleriň çäklerinde ýerine ýetiriljek 37-njy gatnaw bolar.
Mälim bolşy ýaly, ozal hem habar berşimiz ýaly, soňky gezek Moskwa-Türkmenabat-Moskwa ugry boýunça ýörite gatnaw 18-nji fewralda amala aşyrylypdy we ol 36-njy gatnaw boldy.
