Türkmenistan Gyrgyz Respublikasynda geçiriljek Şanhaý Hyzmatdaşlyk Guramasyna agza döwletleriň hökümet Baştutanlarynyň Geňeşiniň mejlisine gatnaşar. Bu barada Gyrgyz Respublikasynyň Ministrler Kabinetiniň metbugat gullugy habar berýär.
ŞHG-niň bu ýokary derejeli duşuşygy 26-njy oktýabrda Bişkek şäherinde geçiriler. Şeýle hem bu sammite Belarusyň, Eýranyň, Gazagystanyň, HHR-iň, Mongoliýanyň, Russiýanyň, Täjigistanyň we Özbegistanyň hökümet Baştutanlary, Hindistanyň we Pakistanyň daşary işler ministrleri gatnaşar.
Şeýle hem şol gün gyrgyz paýtagtynda GDA-nyň hökümet Baştutanlarynyň geňeşiniň mejlisi hem-de Ýewraziýa hökümetara geňeşiniň mejlisi geçiriler.
Bu ýokary derejeli duşuşyklarda özara bähbitli hyzmatdaşlyk gatnaşyklary ara alnyp maslahatlaşylar. Söwda-ykdysady, medeni we ynsanperwer ugurly hyzmatdaşlyga gönükdirilen birnäçe resminamalaryň gol çekilmegine garaşylýar.
Türkmenistan gyrgyz paýtagtyndaky ýokary derejeli duşuşyklarda Ministrler Kabinetiniň Başlygynyň orunbasary Hojamyrat Geldimyradow tarapyndan wekilçilik eder.