Russiýa şu ýylyň ikinji çärýeginde 55,3 million tonna nebiti üstaşyr eksport etmäge gatnaşar. Bu barada «Vesti.ru» habar berýär. Rus portlary arkaly ýylyň birinji çärýeginde eksport edilen nebitiň mukdary 56,5 million tonna ýetdi.
Şol sanda Noworossiýsk portundan 4,9, Ust-Lugu portundan 5,9, Kozmino portundan 8,8, Primorsk portundan 9,6 million tonna «gara altyn» üstaşyr eksport ediler.
Russiýanyň üsti bilen Ýewropa bazaryna nebit çykarýan döwletleriň biri hem Türkmenistandyr. Çeşmäniň berýän habaryna görä, aprel ― iýun aýlary aralygynda 500 müň tonna türkmen nebiti Noworossiýsk portunyň üsti bilen Ýewropa bazaryna çykarylar.
Russiýadan üstaşyr nebit eksportunda biziň döwletimiz ikinji orny eýeleýär. Birinji orundaky Gazagystan ýylyň ikinji çärýeginde Ust-Lugu portundan 1,7, Noworossiýskden bolsa 2,3 million tonna nebiti eskport eder. Üçünji orundaky Azerbaýjanyň bolsa ýylyň ikinji çärýeginde 330 million nebiti Russiýanyň üsti bilen dünýä bazaryna çykarmagyna garaşylýar.