Mälim bolşy ýaly, Türkmenistanyň Prezidentiniň degişli Kararyna laýyklykda, Türkmenistanyň Energetika ministrliginiň “Türkmenenergo” döwlet elektroenergetika korporasiýasyna Türkmenistandan Owganystana elektrik energiýasyny ibermek barada Owganystanyň “Da Afghanistan Breshna Sherkat” kompaniýasy bilen ozal baglaşylan şertnamalara goşmaça ylalaşyklary baglaşmaga ygtyýar berildi.
Şoňa laýyklykda, Owganystanyň “Da Afghanistan Breshna Sherkat” kompaniýasy bilen 2025-nji ýyl üçin elektrik energiýasyny satyn almak babatda şertnamanyň möhleti uzadyldy.
Bu ylalaşyk Owganystanyň “Da Afghanistan Breshna Sherkat” kompaniýasynyň ýerine ýetiriji direktory Abdul Bari Omaryň Türkmenistana amala aşyran saparynyň çäklerinde gol çekildi.
Owgan tarapynyň habaryna görä, Owganystan Türkmenistanyň elektrik energiýasyny 4 ugur boýunça: ýagny Andhoý, Akina, Badgis we Turgundi-Hyrat ugry boýunça import eder.
Owganystan içerki çeşmeleriniň hasabyna 300 megawata golaý elektrik energiýasyny öndürýär, her ýyl Türkmenistandan, Özbegistandan, Täjigistandan we Eýrandan 620 megawatdan gowrak elektrik energiýasyny satyn alýar.