Şu gün Gazagystanyň paýtagty Astanada Merkezi Aziýa döwletleriniň we Amerikanyň Birleşen Ştatlarynyň daşary syýasat edaralarynyň ýolbaşçylarynyň «С5+1» formatyndaky duşuşygy geçirildi. Oňa Türkmenistanyň Ministrler Kabinetiniň Başlygynyň orunbasary, daşary işler ministri Raşid Meredowyň ýolbaşçylygyndaky wekiliýet gatnaşdy.
ABŞ-nyň daşary işler ministri Entoni Blinken Gazagystana özüniň ilkinji resmi saparyny amala aşyryp, Astana şäherinde geçirilýän Merkezi Aziýa döwletleriniň we Amerikanyň Birleşen Ştatlarynyň daşary syýasat edaralarynyň ýolbaşçylarynyň «С5+1» formatyndaky duşuşygyna gatnaşdy.
Gazagystanyň daşary işler ministri Muhtar Tleuberdiniň başlyklyk etmeginde geçirilen duşuşyga ABŞ-nyň daşary işler ministri Entoni Blinkin, Türkmenistanyň Ministrler Kabinetiniň Başlygynyň orunbasary, daşary işler ministri Raşid Meredow, Gyrgyz Respublikasynyň daşary işler ministri Žeenbek Kulubaýew, Täjigistanyň daşary işler ministri Sirojiddin Muhriddin we Özbegistanyň daşary işler ministri Bahtiýor Saidow gatnaşdy.
Duşuşykda ABŞ bilen Merkezi Aziýa döwletleriniň arasyndaky söwda-ykdysady we sebit hyzmatdaşlyk gatnaşyklary ara alyp maslahatlaşyldy.
Duşuşykda edilen çykyşlarda sebitde söwda-ykdysayd gatnaşyklaryň has-da işjeňleşdirilýändigi, 2020-nji ýylda sebit söwdasynyň 25 göterim artyp, 8 milliard dollara barabar bolandygy bellenildi.
Şeýle hem sebit ýurtlarynyň döwlet Baştutanlarynyň yzygiderli ýagdaýda ýola goýlan duşuşyklarynyň netijesinde söwda. ulag we logistika ulgamynda hyzmatdaşlygyň has-da ösdürilýändigi bellenilip, täze goşmaça söwda geçelgelerini döretmegiň üstünde işlenilmeginiň has bähbitli boljakdygy mälim edildi.