Mukaddes Mekge we Medinede haj parzyny berjaý eden türkmen zyýaratçylarynyň ilkinji topary Watanymyza dolanyp geldiler.
Mälim bolşy ýaly, ähli musulmanlaryň nurana baýramy bolan Gurban baýramynyň öňýanynda ýurdumyzyň welaýatlaryndan we Aşgabat şäherinden haj parzyny berjaý etmek üçin ildeşlerimiziň 2000-den gowragy Saud Arabystany Patyşalygynda bolup, dünýäniň dürli künjeklerinden bu ýere gelen zyýaratçylaryň köp sanlysynyň hataryna goşuldylar. Zyýaratçylar yslam dünýäsiniň merkezi hasaplanýan mukaddes Mekgede bolup, keramatly Käbä togap etdiler. Şeýlelikde, ildeşlerimiz Ýer ýüzüniň ähli künjeginden gelen musulmanlar bilen bilelikde haj parzyny berjaý etdiler.
Mukaddes Medinede Muhammet Pygamberiň we onuň sahabalarynyň aramgählerine, belli metjitlere we beýleki keramatly ýerlere zyýarat etdiler.
Mälim bolşy ýaly, Gurban baýramynyň günlerinde hajy Arkadagymyzam mukaddes Mekgä zyýarat etdi we bu ýerde Juma namazyny okady. Munuň özi türkmen halkynyň ynsanperwer ýörelgelere we yslam dünýäsiniň ýagşy dessurlaryna ygrarlydygynyň, jemagat bilen bilelikde namaza durmagyň aýratyn sogaply hasaplanylýandygynyň aýdyň beýanyna öwrüldi.