2024-nji ýylyň 3-5-nji sentýabry aralygynda Türkmenistanyň Oguz han adyndaky Inžener-tehnologiýalar uniwersitetiniň rektory G. Mezilow türkmen wekiliýetiniň düzüminde Koreýa Respublikasynda geçirilen “akylly” şäherleriň “World Smart City Expo” atly Bütindünýä sergisine gatnaşdy.
Türkmenistanyň ýokary okuw mekdebiniň ýolbaşçysy Seulda Koreýa Respublikasynyň Sung Ken Kwan (Seonggyungwan) uniwersitetiniň ýolbaşçylary bilen duşuşdy. Duşuşykda ylym, bilim we tehnologiýa pudagynda ikitaraplaýyn hyzmatdaşlygyň ugurlary ara alnyp maslahatlaşyldy. Bu barada «Türkmenistan: Altyn asyr» saýtynda habar berilýär.
Koreý uniwersitetiniň rektory Ji Bom Ýu “akylly şäher” ugy boýunça ürkmenistanyň Oguz han adyndaky Inžener-tehnologiýalar uniwersiteti bilen hyzmatdaşlygy ýola goýmagy we türkmen uniwersitetiniň çäginde koreý merkezini döretmegi teklip etdi.
Duşuşykda iki ýurduň uniwersitetleriniň arasynda özara düşünişmek hakyndaky ähtnama gol çekişmek mümkinçiliginiň bilelikdäki taslamalary durmuşa geçirmekde hyzmatdaşlygyň esasy guraly bolup hyzmat etjekdigi bellenildi.
Sung Ken Kwan uniwersiteti baý mirasy we dünýä bilim jemgyýetinde ýokary orny eýeleýän Günorta Koreýanyň iň gadymy we abraýly uniwersitetlerinden biridir we 1398-nji ýylda esaslandyryldy.