Türkmenistanyň Söwda-senagat edarasy bilen Ukrainanyň Söwda-senagat edarasynyň arasynda sanly ulgam arkaly duşuşyk geçirildi. Onlaýn tertibinde geçirilen duşuşyga iki ýurduň degişli ministrlikleriniň, pudak edaralarynyň we diplomatik gullugynyň wekilleri we işewürler gatnaşdy.
“orient.tm” internet neşirindäki habara görä, Türkmenistan bilen Ukrainanyň arasyndaky söwda-ykdysady gatnaşyklary we hyzmatdaşlygyň geljekki ugurlary babatdaky pikir alyşmalara Türkmenistanyň Söwda-senagat edarasynyň başlygy Döwletgeldi Rejepow, Ukrainanyň Söwda-senagat edarasynyň başlygy Gennediý Çižikow, Ukrainanyň Türkmenistandaky Adatdan daşary we Doly ygtyýarly ilçisi Wiktor Maýko, Türkmenistanyň Ukrainadaky Adatdan daşary we Doly ygtyýarly ilçisi Toýly Ataýew we beýlekiler gatnaşdy.
Taraplar iki ýurduň önüm öndürijileriniň önümleriniň bäsdeşligini ýokarlandyrmaga mümkinçilik berýän logistika babatda amatly ugurlary ara alyp maslahatlaşdylar.
Wideokonferensiýa gatnaşyjylar ähli ugurlar boýunça türkmen-ukrain söwda we ykdysady hyzmatdaşlygyny güýçlendirmek we işewürlige ähli taraplaýyn goldaw bermek boýunça işleri dowam etdirmek barada ylalaşdylar.